بۇل مەرەكەنىڭ ەل ءۇشىن ماڭىزى زور. قانداي قيىن-قىستاۋ زاماندا بولماسىن ءبىز ىشكى بىرلىگىمىز بەن ىنتىماعىمىزدى ساقتاي العان ەلمىز. دوستىق پەن ءوزارا تۇسىنىستىكتى باعالاپ، ءبىر-ءبىرىن قۇرمەتتەپ، ەلىمىزدەگى بارشا ەتنوس وكىلدەرى بەيبىتشىلىك پەن اشىق اسپان استىندا تۇرىپ جاتىر.
پرەزيدەنتىمىز قاسىم-جومارت كەمەلۇلى توقاەۆ مىرزا قازاقستان حالقى اسسامبلەياسىنىڭ ءحححىى سەسسياسىنداعى سوزىندە:
«ءبىزدىڭ قوعام – ورتاق يدەالدار مەن قۇندىلىقتار بىرىكتىرگەن ەركىن ءارى جاۋاپكەرشىلىگى مول ازاماتتاردىڭ وداعى. بۇل – جالپىۇلتتىق بىرەگەيلىگىمىزدىڭ تاعى ءبىر جارقىن كورىنىسى. سوندىقتان بۇگىندە ازاماتتارىمىزدىڭ بارلىعى وزدەرىن ۇلكەن ءارى ءبىرتۇتاس قازاق وتباسىنىڭ، شىن مانىندە، قازاق ۇلتىنىڭ مۇشەسى سەزىنەدى» دەپ اتاپ وتكەن بولاتىن.
بۇگىندە حالقىمىز ادىلەتتى قازاقستان قۇرۋ يدەياسىنىڭ توڭىرەگىنە بىرىگۋدە. بۇل پروتسەسس مەملەكەت باسشىسى قاسىم-جومارت كەمەلۇلى توقاەۆ مىرزانىڭ باستاماسىمەن قولعا الىنعان اۋقىمدى رەفورمالاردى ىسكە اسىرۋدا كورىنىس تاۋىپ وتىر.
وركەنيەتتى، دەموكراتيالى ەلدەردەگىدەي قازاقستان رەسپۋبليكاسىنىڭ كونستيتۋتسياسى ەتنيكالىق شىعۋ تەگىنە قاراماستان، بارلىق ازاماتتاردىڭ قۇقىقتارى مەن مۇمكىندىكتەرىنىڭ تەڭدىگىنە كەپىلدىك بەرەدى. ال، كوك پاسپورتىمىز بەن كوك تۋىمىز بارشامىزدى بىرىكتىرىپ، قازاقستان اتتى ورتاق وتانىمىزدىڭ ازاماتتارى ەكەنىمىزدى قوعامدىق ساناعا سىڭدىرە العان قاسيەتتى سيمۆولدارىمىز.
بيىل قازاقستان حالقىنىڭ بىرلىگى كۇنى 28-ءشى رەت اتالىپ وتىلۋدە. ءداستۇرلى مەرەكەلەر، فەستيۆالدار، كونتسەرتتەر، سپورتتىق جارىستار مەن مادەني ءىس-شارالاردى قوسا العاندا، مەرەكەلەر ەلىمىزدىڭ بارلىق وڭىرلەرىندە ءوتىپ، كوپەتنوستى قازاقستاننىڭ بىرەگەيلىگى مەن الۋان تۇرلىلىگىن كورسەتەدى.
مەرەكە قۇتتى بولسىن وتانداستار!
