1 مامىر كۇنى قازاقستاندىقتار حالىقتار بىرلىگى مەرەكەسىن تويلايدى، - دەپ حابارلايدى "ادىرنا" پورتالى.
قازاقستان حالقىنىڭ بىرلىگى مەرەكەسى – قازاقستاندا جىل سايىن 1 مامىردا تويلاناتىن مەملەكەتتىك مەرەكە. مەرەكە 1996 جىلى تويلانا باستادى. 1995 جىلى 18 قازاندا قازاقستان پرەزيدەنتى نۇرسۇلتان نازارباەۆ 1 مامىردى قازاقستان حالقىنىڭ بىرلىگى كۇنى دەپ جاريالاۋ تۋرالى جارلىققا قول قويىپ، سول ارقىلى رەسمي تۇردە بۇل كۇندى جۇمىس كۇندەرى تىزىمىنەن الىپ تاستادى.
قازاقستان – كوپۇلتتى مەملەكەت، وندا 150-دەن استام ۇلتتار تۇرادى. وسى جىلدار ىشىندە مەرەكە بارشا قازاقستاندىقتاردى بىرىكتىرەتىن يگى داستۇرگە اينالدى. ونىڭ ماقساتى – حالىقتار دوستىعىنىڭ، بەيبىتشىلىك پەن ىنتىماقتىڭ، جۇزدەگەن مادەنيەتتەردى بىرىكتىرۋدىڭ ماڭىزدى قۇندىلىقتارىن تاعى ءبىر رەت ەسكە ءتۇسىرۋ.
قازاقستان حالقى اسسامبلەياسىنىڭ 32-سەسسياسىندا سويلەگەن سوزىندە مەملەكەت باسشىسى قاسىم-جومارت توقاەۆ 1 مامىردى كەلىسىم، بەيبىتشىلىك جانە ىنتىماق يدەيالارىن قامتيتىن ماڭىزدى مەرەكە دەپ اتادى.
ء"بىزدىڭ قوعام - ورتاق مۇراتتار مەن قۇندىلىقتار بىرىكتىرىلگەن ەركىن جانە سانالى ازاماتتاردىڭ وداعى. بۇل ۇلتتىق بولمىسىمىزدىڭ تاعى ءبىر جارقىن كورىنىسى. سوندىقتان بۇگىندە ءبىزدىڭ بارلىق ازاماتتارىمىز وزدەرىن ءبىر ۇلكەن جانە ءبىرتۇتاس قازاق وتباسىنىڭ مۇشەلەرى رەتىندە سەزىنەدى، شىن مانىندە ءبىز ءبارىمىز ءبىر وتباسىمىز، بۇل جاي سوزدەر ەمەس، بىزدەگى شىندىق.
ءبىزدىڭ تولقۇجاتىمىز ادامعا ەتنوستىق تەگىنە، ءدىني كوزقاراسىنا، الەۋمەتتىك جاعدايىنا قاراماستان قازاقستان رەسپۋبليكاسىنىڭ ازاماتتىعىنا بايلانىستى قۇقىقتار مەن مىندەتتەردىڭ تولىق كەشەنىن بەرەدى. ءبىزدىڭ تولقۇجاتىمىزعا يە بولۋ ارقاشان جانە بارلىق جەردە ءوز مەملەكەتىڭىزدىڭ قامقورلىعىندا بولۋ دەگەن ءسوز»، - دەدى مەملەكەت باسشىسى.
"ادىرنا" ۇلتتىق پورتالى
