1 mamyr kúni qazaqstandyqtar halyqtar birligi merekesin toılaıdy, - dep habarlaıdy "Adyrna" portaly.
Qazaqstan halqynyń birligi merekesi – Qazaqstanda jyl saıyn 1 mamyrda toılanatyn memlekettik mereke. Mereke 1996 jyly toılana bastady. 1995 jyly 18 qazanda Qazaqstan Prezıdenti Nursultan Nazarbaev 1 mamyrdy Qazaqstan halqynyń birligi kúni dep jarııalaý týraly Jarlyqqa qol qoıyp, sol arqyly resmı túrde bul kúndi jumys kúnderi tiziminen alyp tastady.
Qazaqstan – kópultty memleket, onda 150-den astam ulttar turady. Osy jyldar ishinde mereke barsha qazaqstandyqtardy biriktiretin ıgi dástúrge aınaldy. Onyń maqsaty – halyqtar dostyǵynyń, beıbitshilik pen yntymaqtyń, júzdegen mádenıetterdi biriktirýdiń mańyzdy qundylyqtaryn taǵy bir ret eske túsirý.
Qazaqstan halqy Assambleıasynyń 32-sessııasynda sóılegen sózinde Memleket basshysy Qasym-Jomart Toqaev 1 mamyrdy kelisim, beıbitshilik jáne yntymaq ıdeıalaryn qamtıtyn mańyzdy mereke dep atady.
"Bizdiń qoǵam - ortaq murattar men qundylyqtar biriktirilgen erkin jáne sanaly azamattardyń odaǵy. Bul ulttyq bolmysymyzdyń taǵy bir jarqyn kórinisi. Sondyqtan búginde bizdiń barlyq azamattarymyz ózderin bir úlken jáne birtutas qazaq otbasynyń músheleri retinde sezinedi, shyn máninde Biz bárimiz bir otbasymyz, bul jaı sózder emes, bizdegi shyndyq.
Bizdiń tólqujatymyz adamǵa etnostyq tegine, dinı kózqarasyna, áleýmettik jaǵdaıyna qaramastan Qazaqstan Respýblıkasynyń azamattyǵyna baılanysty quqyqtar men mindetterdiń tolyq keshenin beredi. Bizdiń tólqujatymyzǵa ıe bolý árqashan jáne barlyq jerde óz memleketińizdiń qamqorlyǵynda bolý degen sóz», - dedi Memleket basshysy.
"Adyrna" ulttyq portaly
