الماتى قالاسى ءماسليحاتىنىڭ VIII شاقىرىلىمىنداعى «امانات» پارتياسىنان سايلانعان دەپۋتاتى اننا باشينسكايا ۋكراينا پرەزيدەنتى ۆلاديمير زەلەنسكيگە قىرىمنىڭ ورنىنا تۇركياعا شابۋىل جاساۋدى ۇسىندى. بۇل تۋرالى ول Facebook-تەگى Deutsche Welle پاراقشاسىنداعى جازبانىڭ استىنا پىكىر قالدىرعان، دەپ حابارلايدى “ادىرنا” ۇلتتىق پورتالى.
«تۇركيا جاقسىراق، زەلەنسكي مىرزا! ول جەردە جىل بويى جىلى»، - دەپ جازعان باشينسكايا.
ماقالادا زەلەنسكيدىڭ اننەكسيالانعان قىرىمدى ۋكراينانىڭ باقىلاۋىنا قايتارۋىن كوزدەيتىن قارسى شابۋىلدى جوسپارلاپ وتىرعانى ايتىلعان. زەلەنسكي سۇحباتىندا ۋكراينانىڭ تابىسى نەگىزىنەن باتىستىڭ كيەۆكە قارۋ-جاراق جەتكىزۋدى جالعاستىرا بەرۋىنە بايلانىستى ەكەنىن اتاپ ءوتتى.
پىكىر بىلدىرۋشىلەر باشينسكايانىڭ قازاقستان ازاماتى بولا تۇرا، باسقا ەلدىڭ پرەزيدەنتىنە ۇسىنىس جاساعانىنا تاڭ قالعان.
اننا باشينسكايا Facebook پاراقشاسىندا جازعان پىكىرى ءۇشىن وكىنەتىنىن ايتىپ، كەشىرىم سۇرادى.
“مەن تۇركيا تۋرالى جازعاندا ونى مۇلدە ايتقىم كەلگەن جوق. مەن تۇرىك باۋىرلارىمىزدان كەشىرىم سۇرايمىن. ۋكراينا مەن رەسەيگە بەيبىتشىلك تىلەيمىن. بۇل جاعدايعا پىكىر بىلدىرۋگە مەنىڭ قۇقىعىم جوق، مەنىز ءوز ەلىم بار، مەن دەپۋتات رەتىندە ەڭ الدىمەن ەلدىڭ قامىن ويلاۋىم كەرەك”،- دەپ جازدى ول Facebook پاراقشاسىنا.
سونداي-اق، ول Deutsche Welle پاراقشاسىنداعى جازبانىڭ استىنا قالدىرعان پىكىرىن ءوشىرىپ تاستادى.
