قر پرەمەر-ءمينيسترى ءاليحان سمايىلوۆ پەن تۇرىكتىڭ «گاپ ينشاات» كومپانياسى باس ديرەكتورىنىڭ مىندەتىن اتقارۋشى چەنگەل ازيز قازاقستاندا جاڭا ينۆەستيتسيالىق جوبالاردى ىسكە قوسۋ پەرسپەكتيۆالارىن تالقىلادى. بۇل تۋرالى ۇكىمەتتىڭ ءباسپاسوز قىزمەتى ايتتى، دەپ حابارلايدى «ادىرنا» ءتىلشىسى.
كەزدەسۋ بارىسىندا چەنگەل ازيز كومپانيا رەسپۋبليكاداعى ينۆەستيتسيالارىن كەڭەيتۋگە مۇددەلى ەكەنىن جەتكىزدى. ونىڭ ايتۋىنشا، كوكشەتاۋ قالاسىندا جىلۋ ەلەكتر ورتالىعىن (جەو) سالۋ جوباسىنىڭ بولاشاعى زور.
پرەمەر-مينيستر تۇركيا رەسپۋبليكاسى قازاقستان ءۇشىن ماڭىزدى ستراتەگيالىق سەرىكتەس ەكەنىن، سوندىقتان ۇكىمەت ءوزارا ءتيىمدى جاڭا جوبالاردى ىسكە اسىرۋدى قولدايتىنىن اتاپ ءوتتى.
بۇل رەتتە ءاليحان سمايىلوۆ قر ەنەرگەتيكا مينيسترلىگى كوكشەتاۋدا جەو سالۋ جوباسى بويىنشا اشىقتىق پەن باسەكەلەستىك قاعيداتتارىمەن اشىق تەندەر وتكىزەتىنىن، وعان بارلىق الەۋەتتى ينۆەستورلار قاتىسا الاتىنىن ايتتى.
ءوز كەزەگىندە چەنگەل ازيز تەندەرگە قاتىسۋعا دايىن ەكەنىن مالىمدەدى.
ازىرلەنگەن تەحنيكالىق-ەكونوميكالىق نەگىزدەمەگە سايكەس، كوكشەتاۋداعى جاڭا جەو-نىڭ ەلەكتر قۋاتى 240 مۆت، جىلۋ قۋاتى – 520 گكال/ساع.
جوبانى قارجىلاندىرۋ تەندەردە جەڭىپ شىققان ينۆەستوردىڭ قاراجاتى ەسەبىنەن جۇزەگە اسىرىلادى.
