حقكو-عا ەرتەرەك بارماعانىم ءۇشىن كەشىرىڭىزدەر  - باعدات مۋسين

773

وتكەن اپتانىڭ سوڭىندا قازاقستان رەسپۋبليكاسى تسيفرلىق دامۋ، يننوۆاتسيالار  جانە اەروعارىش ءمينيسترى باعدات مۋسين نۇر-سۇلتان قالاسىنداعى حالىققا قىزمەت كورسەتۋ ورتالىقتارىنىڭ بىرىنە «مينيستر» رەتىندە ەمەس، جاي قىزمەت الۋشى، كليەنت رەتىندە باردى. بۇل تۋرالى «ادىرنا» ۇلتتىق پورتالى ءمينيستردىڭ  ينستاگرامم پاراقشاسىنداعى جازباسىنا سىلتەمە جاساي وتىرىپ حابارلايدى.

«حقكو-نىڭ ءبارى ءبىزدىڭ كوڭىلىمىز قالاعانداي، ويداعىداي ەمەس ەكەن. كۇتپەگەن كەزدە، توسىننان بارۋ  جالپى جاعدايمەن تانىسۋدىڭ ەڭ ءتيىمدى ءادىسى ەكەندىگىن تاعى دا ءتۇسىندىم. بۇعان دەيىن باسشى رەتىندە بارىپ ەدىم»، - دەپ اعىنان جارىلىپتى ەلىمىزدىڭ «ەڭ جاس مينيستر» ب.مۋسين.

ول حقكو بارعانداعى ءوز كوزىمەن كورگەن «كوڭىلگە قونىمسىز» كورىنىستەردى دە تىزىمدەپ، ناقتى ايتىپتى:

  1. «حقكو ماڭايىندا «كومەك قولىن سوزعىش» دۇڭگىرشەكتەر قاپتاپ كەتىپتى. ولار «اقىسىنا» ەتسق شىعارىپ بەرۋگە جانە ەگوۆ پورتالىنىڭ قىزمەتتەرىن الۋعا كومەكتەسەدى. پاندەميا كەزىندە حقكو-داعى وزىنە-ءوزى قىزمەت كورسەتۋ ورىندارى جابىلىپ قالعان ەدى، الايدا بۇل سوندايلىق دۇرىس شەشىم بولماعاندىعىن كورىپ وتىرمىز. ادامدار جاڭاعى دۇڭگىرشەكتەرگە جينالعاندىقتان ۆيرۋس جۇقتىرۋ قاۋپى دە باسىم، ونىڭ ءۇستىن «تەگىن» الۋعا بولاتىن قىزمەت ءۇشىن «اقى» تولەيدى.

ءبىر اپتا ىشىندە ءوز-وزىنە قىزمەت كورسەتۋ ورىندارىن قايتا قالپىنا كەلتىرۋدى تاپسىردىم! پاندەميامەن كۇرەسۋگە كومەكتەسكەندەي سىڭاي تانىتقانداي بولماي، سانيتارلىق جاعدايدى باقىلاۋعا ۇستاي وتىرىپ، حقكو-دا جۇمىس ىستەگەنىمىز دۇرىس.

  1. حقكو-نىڭ سانيتارلىق توراپتارىنداعى (دارەتحانالار مەن قول جۋاتىن ورىندار) جاعداي دا ءماز ەمەس ەكەندىگى  بايقالادى.

ولاردى تەز ارادا جوندەۋگە قارجى ءبولۋ، سانيتارلىق توراپتاردى ءار ساعات سايىن سۋرەتكە ءتۇسىرىپ، ول فوتولاردى  باسشىلارعا جانە احۋالدىق ورتالىققا جىبەرىپ وتىرۋ  تاجىريبەسىن ەنگىزۋ  تۋرالى شەشىم قابىلداندى. سونداي-اق، "ازاماتتارعا ارنالعان ۇكىمەت" كەاق وڭىرلىك جانە اۋداندىق باسشىلارىن جەكە جۋىناتىن بولمەلەرى بار ءساندى كابينەتتەردەن  ايىرۋدى تاپسىردىم.  باسشى كليەنتپەن بىرگە ءبىر سانيتارلىق توراپقا بارۋى كەرەك، سوندا جاعداي باسقاشا بولادى دەپ ويلايمىن.

  1. رەسەپشننىڭ قاسىندا دا ادام كوپ. بۇعان سەبەپ كليەنت كەڭەس الىپ بولعان سوڭ عانا تالون بەرىلەتىندىگى. مەنىڭ كوزىمشە از دەگەندە 5 ادام انىقتامالاردى باسىپ شىعاردى.

تۇتىنۋشىلاردىڭ ەڭ كوپ الاتىن قىزمەت تۇرلەرىنە، مىسالى: «ەگەر جەكە كۋالىگىڭ جوعالسا نە ىستەۋ كەرەك؟»، «پاتەرىڭىزدە ءسىز تانىمايتىن ادام تىركەۋدە تۇرعاندىعىن بىلگەن جاعدايدا قايتپەك كەرەك؟» جانە ت.ب. سۇراقتار بويىنشا  قىسقا دا نۇسقا،ءارى ناقتى كەڭەستەر كورسەتىلگەن ءبىر بەتتىك جەكە-جەكە اقپارات-پاراقشالار دايىنداۋ كەرەكتىگى تۋرالى شەشىم قابىلداندى.

ال انىقتامالاردى باسىپ شىعارۋ ءۇشىن سول باياعى ەسكى بولسادا ىڭعايلى ينفوكيوسكىلەر قايتادان ىسكە قوسىلادى، وعان كۋالىگىڭىزدى قويىپ، سكانەردەن وتكىزىپ، كەز-كەلگەن انىقتامانى شىعارۋعا نەمەسە قىزمەت الۋعا ءوتىمىم بەرۋگە بولادى.

  1. جەكە كۋالىگىمدى قالپىنا كەلتىردىم. سۋرەتكە تۇسىرگەن سوڭ، ادام سۋرەتكە قالاي تۇسكەنىن كورۋ  ۇشىن  ورنىنان تۇرىپ وپەراتوردىڭ مونيتورىنا ۇڭىلۋگە ءماجبۇر. بۇل ىڭعايسىز.

بارلىق جەرگە ەكىنشى مونيتور قويۋ كەرەكتىگى تۋرالى شەشىم شىعارىلدى. بۇل شەشىم شىندىعىندا 2013 جىلعى ستاندارتتا بەكىتىلگەن بولاتىن! 2013 جىلى ەنگىزىلگەن نارسەنى  قايتا قايتارۋعا تۋرا كەلىپ تۇر!

  1. قانداي دا ءبىر قۇجاتتىڭ دايىن بولعاندىعى تۋرالى ءبىلۋ ءۇشىن قازىر حقكو قوڭىراۋ شالۋعا  ماجبۇرسىڭ. (2008 جىلدىڭ وزىندە تيمۋر ءجۇنىسوۆتىڭ ايتۋى بويىنشا قۇجاتتىڭ دايىن ەكەندىگى جانە ونى الىپ كەتۋگە بولاتىندىعى تۋرالى سمس-حابارلامالار جاسالىنعان ەدى).

از ۋاقىتتىڭ ىشىندە كليەنتتەرگە سمس-حابارلاما جولداۋ بويىنشا سەرۆيستى قايتا قالپىنا كەلتىرۋ تۋرالى شەشىم قابىلداندى.

  1. كەزەكتى برونداۋ – ءبىر پايداسى جوق دۇنيە. كەزەكتى بروندايسىڭ، ەرتەرەك كەلەسىڭ، ال سەنىمەن بىرگە برونسىز  ادامدار دا كەلەدى، ۇرىسىسادى، داۋلاسادى سودان ولارعا دا قىزمەت كورسەتىلەدى.

بروندى تەك  بەلگىلى ءبىر فوكۋس توبى  (ول جەرگە ءار ءتۇرلى جاستاعى ادامدار كىرەتىن بولادى) قولدانا الاتىن كەزدە عانا مىندەتتى قىلۋ كەرەكتىگى تۋرالى شەشىم قابىلداندى.

حقكو-عا بۇدان ەرتەرەك بارماعانىم ءۇشىن كەشىرىڭىزدەر.بارلىق قىزمەت تۇرلەرىن ونلاينعا اۋىستىرىپ، حقكو بارۋ قاجەتتىلىگىن جويۋدى ويلادىم. الايدى، جاسى ۇلكەن ادامدار ءۇشىن حقكو بارۋ الدەقايدا ءتان قۇبىلىس ەكەندىگىن مويىندايمىن، سوندىقتان  بۇدان بىلاي دا قىزمەت كورسەتۋ كەزىندەگى جاسالاتىن جايلىلىق جولىندا تەر توگەمىن».

فوتو ب.ءمۋسيننىڭ ينستاگرامم پاراقشاسىنان الىندى

ەركە جومارت

«ادىرنا»  ۇلتتىق پورتالى

 

پىكىرلەر
ۇقساس جاڭالىقتار