بۇگىن الماتى وبلىسىنىڭ اكىمى مارات سۇلتانعازيەۆ رايىمبەك اۋدانىنىڭ تۇرعىندارىمەن كەزدەستى.
باسقوسۋ ادەتتەگىدەي، مال جانە اۋىل شارۋاشىلىعى جايلى باياندامادان باستالدى.
ءوڭىر باسشىسى رايىمبەك اۋدانى كارتوپ وندىرۋدەن الدىڭعى قاتاردا ەكەنىن، دەگەنمەن بۇل اۋماقتىڭ ونەركاسىپ ءونىمىن ءوندىرۋ كولەمى بويىنشا كەنجەلەپ تۇرعانىن ايتتى.
«اۋداندا جۇمىس ىستەيتىن 14 ونەركاسىپتىك كاسىپورىن – شاعىن كاسىپكەرلىك سۋبەكتىلەرى. ونىڭ ىشىندە، كومىر ءوندىرۋ بويىنشا «بۇركىت» كومپانياسى جانە التىن ءوندىرۋ بويىنشا «نارىن گولد» بۇگىندە ءوز قىزمەتىن توقتاتتى»، – دەدى وبلىس اكىمى.
سونىمەن قاتار مارات سۇلتانعازيەۆ اۋداندا ينۆەستيتسيا تارتۋ جۇمىسى دا كوڭىل كونشىتەرلىك ەمەس ەكەنىن تىلگە تيەك ەتتى.
«ينۆەستيتسيالار تارتۋ بويىنشا اۋدان 1,4 پايىز ۇلەسىمەن وبلىستا 8-ءشى ورىن الىپ وتىر. بىلتىر 8,7 ملرد. تەڭگە ينۆەستيتسيا تارتىلدى. 2025 جىلعا دەيىن مۇندا 9 جوبا جۇزەگە اسىرىلادى، ال جوعارىدا ايتقانداي، 2 جوبا توقتاپ تۇر»، – دەدى وبلىس اكىمى.
بۇل ماسەلەلەردى شەشۋ ءۇشىن مارات سۇلتانعازيەۆ ءوزىنىڭ ورىنباسارى ارسلان داندىباەۆقا، كاسىپكەرلىك باسقارماسىنا اۋدان اكىمىمەن بىرلەسىپ، ينۆەستورلارعا جان-جاقتى قولداۋ كورسەتىپ، اۋدان ەكونوميكاسىنا ينۆەستيتسيا تارتۋ جۇمىسىن ارتتىرۋدى جانە جۇمىس ىستەپ تۇرعان كاسىپورىنداردى كەڭەيتۋ ارقىلى ءوندىرىستى ۇلعايتۋدى تاپسىردى.