ۇكىمەت سىبايلاس جەمقورلاردان سوت ارقىلى الىنىپ، مەملەكەتكە وتكەن اقشالاي قاراجاتتى مەكتەپتەردىڭ قۇرىلىسىنا بەرۋ تەتىگىن بەكىتتى. ءتيىستى تۇزەتۋلەر ەنگىزىلگەن قاۋلىعا پرەمەر-مينيستر ءاليحان سمايىلوۆ قول قويدى، دەپ حابارلايدى «ادىرنا» ءتىلشىسى.
مەملەكەت باسشىسى قاسىم-جومارت توقاەۆ 2022 جىلعى 1 قىركۇيەكتەگى «ادىلەتتى مەملەكەت. ءبىرتۇتاس ۇلت. بەرەكەلى قوعام» اتتى حالىققا جولداۋىندا جەمقورلاردان الىنعان قاراجاتتى ءبىلىم بەرۋ ينفراقۇرىلىمىن قولداۋعا باعىتتاۋدى تاپسىرعان بولاتىن.
«جالپى، مەكتەپ سالۋ ۇكىمەت پەن اكىمدىكتەر ءۇشىن باستى مىندەتتەردىڭ ءبىرى بولۋى كەرەك. جەمقورلار سوتتالعاندا، ولاردىڭ زاڭسىز تاپقان قارجىسى مەملەكەتكە ءوتىپ، تۇگەلدەي مەكتەپ قۇرىلىسىنا جۇمسالۋعا ءتيىس»، — دەدى ول.
ۇكىمەتتىڭ ءباسپاسوز قىزمەتىنىڭ جازۋىنشا، بۇگىنگى تاڭدا ءبىلىم بەرۋ ينفراقۇرىلىمىن قولداۋ قورىنا 121,7 ملرد تەڭگە تۇسكەن.
«ەل باسشىلىعىنىڭ تاپسىرماسى بويىنشا رەسپۋبليكالىق بيۋدجەت كوميسسياسى 106,7 ملرد تەڭگەنى قۇرايتىن 72 جوبانى قولدادى. اتاپ ايتقاندا، 94,1 ملرد تەڭگە 85 مىڭ ورىندىق 69 مەكتەپتىڭ قۇرىلىسىن اياقتاۋعا جانە تاعى 12,6 ملرد تەڭگە 3 جاڭا نىساننىڭ (ەكى اۋىسىمدا 1400 ورىنعا ارنالعان 2 مەكتەپ جانە 200 ورىندىق مەكتەپ-ينتەرنات) قۇرىلىسىن اياقتاۋعا باعىتتالادى.
وسىلايشا، بۇل مەحانيزم ءۇش اۋىسىمدى وقىتۋ، اپاتتى مەكتەپتەر مەن وقۋشى ورىندارىنىڭ جەتىسپەۋشىلىگى ماسەلەلەرىن شەشۋگە ايتارلىقتاي ۇلەس قوسادى»،—دەپ ءتۇسىندىردى باسقارما.
