قاسىم-جومارت توقاەۆ اتوم ەنەرگياسى جونىندەگى حالىقارالىق اگەنتتىكتىڭ باس ديرەكتورى رافاەل گروسسيگە ءىلتيپات بىلدىرە وتىرىپ، ونىڭ ساپارى قازاقستان مەن اگەنتتىك اراسىنداعى ىنتىماقتاستىقتى ودان ءارى نىعايتۋ ءۇشىن ماڭىزدى ەكەنىن اتاپ ءوتتى.
– ءسىزدىڭ ساپارىڭىز ءوزارا قارىم-قاتىناسىمىزدى دامىتۋ تۇرعىسىنان دەر كەزىندە جاسالىپ وتىرعانىنا سەنىمدىمىن. قازاقستان ءۇشىن اگەنتتىكپەن جۇمىس ىستەۋدىڭ ءمانى زور. اسا ماڭىزدى قۇرىلىمنىڭ باسشىسى رەتىندەگى ءسىزدىڭ قىزمەتىڭىزدى قولدايمىز جانە جوعارى باعالايمىز، – دەدى پرەزيدەنت.
كەزدەسۋ بارىسىندا تەحنيكالىق سالاداعى ىنتىماقتاستىقتى نىعايتۋعا جانە ەلىمىزدە اەس سالۋعا قاتىستى اۋقىمدى ماسەلەلەر تالقىلاندى.
پرەزيدەنت اتوم ەنەرگياسىن بەيبىت ماقساتتا پايدالانۋ جانە يادرولىق قاۋىپسىزدىك رەجيمىن نىعايتۋ ماسەلەلەرىندە اگەنتتىكتىڭ ماڭىزدى ءرول اتقاراتىنىن اتاپ ءوتتى.
رافاەل گروسسي قۇرمەت كورسەتكەنى ءۇشىن قاسىم-جومارت توقاەۆقا العىس ايتىپ، يادرولىق قارۋدان باس تارتۋ جانە ونى تاراتپاۋ ۇدەرىسى كوشباسشىلارىنىڭ ءبىرى ءارى جاۋاپتى جاقتاۋشىسى رەتىندە قازاقستاننىڭ ءرولىن جوعارى باعالادى.
– ءبىز ءتۇرلى سالادا كوپ ءىستى بىرگە اتقارىپ كەلەمىز. دەنساۋلىق ساقتاۋ سالاسىنان باستاپ يادرولىق ەنەرگەتيكانى دامىتۋعا قاتىستى بولاشاق باعدارلاماڭىزعا دەيىن كوپتەگەن ماسەلە بويىنشا سىزبەن پىكىر الماساتىنىما وتە قۋانىشتىمىن، – دەدى اتوم ەنەرگياسى جونىندەگى حالىقارالىق اگەنتتىكتىڭ باس ديرەكتورى.
"ادىرنا" ۇلتتىق پورتالى
