پرەزيدەنت قاسىم-جومارت توقاەۆ قازاقستاندىقتاردى العىس ايتۋ كۇنىمەن قۇتتىقتادى، دەپ حابارلايدى «ادىرنا» ءتىلشىسى.
«قۇرمەتتى وتانداستار! سىزدەردى العىس ايتۋ كۇنىمەن قۇتتىقتايمىن! بۇل – حالقىمىزدىڭ ەڭ اسىل قۇندىلىقتارىن دارىپتەيتىن ەرەكشە مەرەكە. ءوزارا قۇرمەت كورسەتۋ، وزگەگە جاناشىرلىقپەن قاراپ، شىنايى تىلەۋلەس بولۋ – ۇلتىمىزدىڭ بويىنا سىڭگەن قاسيەتتەر. العىس ايتۋ ءداستۇرى ءتول رۋحانياتىمىزدىڭ تەمىرقازىعى رەتىندە ەل ىشىندەگى سەنىم مەن بىرلىكتى نىعايتۋعا زور ىقپال ەتىپ كەلەدى. جاقىندارىمىزعا العىس ايتۋ – ولارعا رۋحاني قولداۋ كورسەتۋ، قيىن كەزدە قول ۇشىن سوزۋ دەگەن ءسوز. قازىرگى قۇبىلمالى زاماندا بۇل قاسيەتتىڭ ءمان-ماڭىزى ەرەكشە»،-دەدى ول.
مەملەكەت باسشىسى ەلىمىزدىڭ ءوسىپ-وركەندەۋىنە ۇلەس قوسىپ جۇرگەن بارشا ازاماتقا ريزالىشىلىعىن ءبىلدىردى.
ء«بىز وسى مەيرامدا، ەڭ الدىمەن، قيىن-قىستاۋ جىلدارى ەلىمىزدى امان ساقتاپ، ۇرپاققا اسا قۇندى ءارى مول مۇرا قالدىرعان اتا-بابالارىمىزعا تاعزىم ەتەمىز. ۇستازدارعا، دارىگەرلەرگە، مادەنيەت سالاسى قىزمەتكەرلەرىنە، كاسىپكەرلەرگە، جۇمىسشىلارعا، ءتارتىپ ساقشىلارىنا، ءورت سوندىرۋشىلەرگە، قۇتقارۋشىلارعا جانە ادال ەڭبەگىمەن سۇيىكتى وتانىمىزدىڭ ءوسىپ-وركەندەۋىنە ەلەۋلى ۇلەس قوسىپ جۇرگەن بارشا ازاماتقا العىس ايتامىز. سونداي-اق جاستارعا جانە ەرىكتىلەرگە ەرەكشە ريزاشىلىعىمدى بىلدىرەمىن. بەلسەندى ازاماتتىق ۇستانىمى بار، قوعام يگىلىگى ءۇشىن ەڭبەك ەتۋگە ءازىر، مۇقتاج جاندارعا كومەكتەسۋگە دايىن ادامداردىڭ ەڭبەگى ەرەن. بۇل – جاسامپاز ءارى جاۋاپتى وتانشىلدىقتىڭ ايقىن كورىنىسى»،-دەپ جازدى توقاەۆ.
مەملەكەت باسشىسى قازاقستاننىڭ اۋقىمدى ءارى تاريحي بەتبۇرىس كەزەڭىنە قادام باسقانىن اتاپ ءوتتى.
«رەسپۋبليكالىق رەفەرەندۋمعا شىعارىلعان جاڭا حالىقتىق كونستيتۋتسيانىڭ جوباسى ادام قۇقىقتارىن قورعاۋ جۇيەسىن جاقسارتۋعا، بيلىك ينستيتۋتتارىنىڭ جاۋاپكەرشىلىگىن كۇشەيتىپ، تيىمدىلىگىن ارتتىرۋعا، قاستەرلى تاۋەلسىزدىگىمىز بەن ەگەمەندىگىمىزدى نىعايتۋعا مۇمكىندىك بەرەدى. جاڭا اتا زاڭ ءبارىمىز ءبىر ەل بولىپ ىرگەسىن قالاپ جاتقان جارقىن بولاشاققا جول اشادى.
العىس ايتۋ كۇنى ەل تاعدىرى ءاربىر ازاماتتىڭ قولىندا ەكەنىن اڭعارتادى. سەبەبى الداعى وزگەرىستەردىڭ تابىستى جۇزەگە اسىرىلۋى جۇرتىمىزدىڭ بىرلىگىنە، پاراساتتىلىعىنا جانە سانالى ازاماتتىق ۇستانىمىنا بايلانىستى ەكەنى ءسوزسىز. ءبىز زاڭ مەن ءتارتىپ، تىلەكتەستىك پەن ىنتىماق قاعيدالارىن باسشىلىققا الىپ، سالت-ءداستۇرىمىزدى ساقتاي بىلسەك، قۋاتتى، ادىلەتتى، تازا، وركەندەگەن قازاقستاندى قۇرا الامىز»،-دەپ تۇيىندەدى ول.
ايتا كەتەيىك، 2016 جىلدىڭ 14 قاڭتارىندا 1 ناۋرىز العىس ايتۋ كۇنى دەپ جاريالانعان بولاتىن. 1995 جىلى 1 ناۋرىزدا قازاقستان حالقى اسسامبلەياسى قۇرىلعان. العىس ايتۋ كۇنىنىڭ نەلىكتەن ءدال وسى كۇنى تويلاناتىنى بەلگىلى. بۇل — قازاقستان حالقىن بىرىكتىرۋگە باعىتتالعان، ەل تاريحىنا قۇرمەت كورسەتىپ، بارلىق ۇلت پەن ۇلىستى ءبىر شاڭىراق استىنا توپتاستىراتىن كۇن.
