مەملەكەت باسشىسى قاسىم-جومارت توقاەۆ قازاقستاننىڭ ترانزيتتىك الەۋەتىن تولىق پايدالانۋ ءۇشىن جول ينفراقۇرىلىمى مەن اۋە جۇك تاسىمالى سالاسىن دامىتۋ قاجەت ەكەنىن ايتتى. بۇل تۋرالى پرەزيدەنت جولداۋىندا مالىمدەدى، دەپ حابارلايدى «ادىرنا» ءتىلشىسى.
پرەزيدەنتتىڭ سوزىنشە، ساپالى جولدار مەن زاماناۋي جول بويى قىزمەت كورسەتۋ ينفراقۇرىلىمى بولماسا، قازاقستان جاھاندىق ترانزيتتىك ءدالىز نەمەسە ەۋرازيانىڭ كولىك-لوگيستيكالىق حابى مارتەبەسىنە يە بولا المايدى.
مەملەكەت باسشىسى شەكاراداعى كولىك كەپتەلىستەرىن دە وزەكتى ماسەلە رەتىندە اتاپ ءوتتى. ونىڭ پىكىرىنشە، شەكاراداعى وتكىزۋ قابىلەتىنىڭ تومەندىگى ەلدىڭ ترانزيتتىك سالاداعى كوشباسشىلىققا ۇمتىلىسىنا كەدەرگى كەلتىرەدى.
«ەگەر شەكارا بىرنەشە شاقىرىمعا سوزىلاتىن كولىك كەپتەلىستەرىنە سەبەپ بولاتىن «تار وتكەلگە» اينالسا، ال ءدال قازىر جاعداي وسىنداي بولسا، قازاقستاننىڭ كوشباسشىلىعى تۋرالى ءسوز قوزعاۋدىڭ ءوزى مۇمكىن ەمەس»، – دەدى قاسىم-جومارت توقاەۆ.
پرەزيدەنت ەۋروپا مەن ازيانى بايلانىستىراتىن نەگىزگى اۋە دالىزدەرى قازاقستاننىڭ اۋماعى ارقىلى وتەتىنىن ايتىپ، بۇل مۇمكىندىكتى ءتيىمدى پايدالانۋ قاجەتتىگىن جەتكىزدى. ول ءۇشىن جەرۇستى سەرۆيستىك ينفراقۇرىلىمدى دامىتۋ ماڭىزدى ەكەنىن اتاپ ءوتتى.
سونىمەن قاتار مەملەكەت باسشىسى اۋە جۇك تاسىمالى سالاسىنداعى «Air Cargo» جەكە كومپانياسىنىڭ جۇمىسىنا توقتالدى. ونىڭ ايتۋىنشا، كومپانيانىڭ قارجىلاندىرۋ مۇمكىندىگى مول، شەتەلدىك بىلىكتى مامانداردى تارتۋعا جانە دەربەس شەشىم قابىلداۋعا الەۋەتى بار. الايدا ازىرگە ناقتى ناتيجەلەر بايقالماي وتىر.
«سىزدەرگە سەنىم ءبىلدىرىلدى. ەندى ناقتى ناتيجە كۇتەمىز»، – دەدى پرەزيدەنت.
مەملەكەت باسشىسى قازاقستاننىڭ ترانزيتتىك الەۋەتىن ىسكە اسىرۋ ءۇشىن ينفراقۇرىلىمدى دامىتۋ جانە قولدا بار مۇمكىندىكتەردى ەكونوميكالىق تابىسقا اينالدىرۋ قاجەتتىگىن باسا ايتتى.
