ءماجىلىس سايلاۋىنىڭ دۇركىرەپ ءوتىپ، حالىق قالاۋلىلارىنىڭ جۇمىسقا كىرىسكەنىنە ايعا جۋىقتاپ قالدى. دەپۋتاتتىق مانداتقا يە بولعاندار ءماجىلىس مىنبەرىنەن العاشقى دەپۋتاتتىق ساۋالدارىن ۇكىمەت مۇشەلەرىنە جولداپ، پارلامەنتكە كەلگەن ءبىرلى-جارىم مينيسترلەردى قاعىپ-سىلكىپ العانىنا كۋا بولدىق.
ازىرشە ءماجىلىستىڭ جاڭا قۇرامىنىڭ قارقىنى جامان ەمەس. وسى باعىتتان اينىماسا بولعانى.
جالپى، ۇلكەن ساياسي رەفورمادان كەيىن جاساقتالعان ءماجىلىستىڭ قازىرگى قۇرامىنا قاراپ، قازاق ءتىلى ساياساتتىڭ تىلىنە اينالعانىن انىق بايقاۋعا بولادى. بۇگىندە وزەكتى، وتكىر دۇنيەلەردىڭ كوپشىلىگى قازاق تىلىندە ايتىلىپ، قازاق تىلىندە ءسوز بولىپ جاتىر.
ماسەلەن، وسىعان دەيىن “سامۇرىق-قازىنا” ءال-اۋقات قورىن باسقارىپ، شالقىپ-تاسىپ كۇن كەشكەن سۋ جاڭا ەنەرگەتيكا ءمينيسترى الماسادام ساتقاليەۆتى دەپۋتاتتار قازاق تىلىندە سويلەۋدى تالاپ ەتكەننەن كەيىن ول كوپشىلىك الدىندا 6 ايدا قازاق ءتىلىن ۇيرەنىپ، دەپۋتاتتار مەن جۋرناليستەردىڭ ساۋالدارىنا قازاق تىلىندە جاۋاپ بەرەتىنىن ايتىپ، انت-سۋ ءىشتى.
ەندى 6 ايدىڭ وتكەنىن كۇتەمىز.
ساتقاليەۆتىڭ حالىق الدىندا ۋادە بەرۋىنە ءبىرىنشى كەزەكتە دەپۋتاتتار، ودان كەيىن جۋرناليستتەر قاۋىمى دا ىقپال ەتكەنى ءسوزسىز.
وسى رەتتە جاڭا قازاقستاننىڭ دەپۋتاتتارى قوعامدىق ومىردە قانى تامىپ تۇرعان قاندايدا ءبىر ماسەلەلەردى جاسقانباي ايتاتىن بولسا، ونى جۋرناليستەر ءىلىپ اكەتىپ، الگى ماسەلە وڭ باعىتتا شەشىلمەيىنشە، قوعامدىق پىكىردى كۇشەيتەتىن كۇشە يە ەكەنىن وسى جولى تاعى دا كوزىمىز جەتتى.
مۇنداي ساتتەردە جۋرناليستەر قاۋىمى دا وزدەرىنىڭ قوعامدىق-ساياسي ومىردە ءتورتىنشى بيلىكتىڭ وكىلى ەكەنىن سەزىنەرى انىق.
وسى تۇرعىدان العاندا دەپۋتاتتاردىڭ وزەكتى ماسەلەلەردى قاۋزاپ، قوعامدىق ويدىڭ گەنەراتورىنا اينالۋى ماڭىزدى ەكەنىن بايقايسىڭ.
راس، پارلامەنت قابىرعاسىندا قوعامدىق ويدىڭ گەنەراتورىنا اينالاتىن دەپۋتاتتار بار. ولار – باقىتجان بازاربەك، ەرمۇرات باپي، قازىبەك يسا، ابزال قۇسپانوۆ جانە رينات زايتوۆ.
وسىلاردىڭ اراسىندا باقىتجان بازاربەكتىڭ قارقىنى كوپشىلىكتىڭ قۋانتىپ وتىرعانى انىق.
بۇگىندە ول ءوزى جىلدار بويى كوتەرىپ جۇرگەن جەردى زاڭسىز باسىپ الۋ ماسەلەسى جوعارى دەڭگەيدە كوتەرىپ قازاق جەرىن باۋىرىنا باسىپ العان لاتۋفينديستتەردىڭ ىشكەنىن ءىرىڭ، جەگەنىن جەلىم قىلۋعا تاس ءتۇيىن بەكىنگەندەي… باكەڭنىڭ وسى باعىتتا جۇمىس ىستەگەنىن حالىق تا قولدايدى.
بۇدان باسقا Respublica پارتياسىنان دەپۋتاتتىق مانداتقا يە بولعان قىز-جىگىتتەر دە ءوز پارتيالارىنىڭ قوعامدىق-ساياسي ومىردە تانىمالدىعى ارتۋى ءۇشىن وزەكتى ماسەلەلەردى كوتەرىپ ساياساتتىڭ كوركىن قىزدىراتىنىنا سەنىمدىمىز.
سونىمەن قاتار “اق جول” پارتياسى دا ساياسي باسەكەدەن قالماي باتىل باستامالاردى قولعا الىپ، سايلاۋشىلاردىڭ كوڭىلىنەن شىعۋعا بارىن سالاتىنى انىق.
پارلامەنتتەگى وسىداي ارەكەتتەردى كورگەننەن كەيىن بويىنا ارتىق سالماق جيناعان AMANAT پارتياسى دا سالماعىنان ايىرىلىپ، ىلدىم-جىلدىم شۇعىل ارەكەتكە بەيىمدەلۋىنە تۋرا كەلەدى.
وسىعان دەيىن قالعىپ-مۇلگىپ وتىرعان AMANAT-تىڭ ەسكى قۇرامى قاتارلارىن جاڭادان قوسىلعان باقىتجان بازاربەك سىندى ارىپتەستەرىمەن سينحروندى تۇردە جۇمىس ىستەۋگە ءماجبۇر.
سوندىقتان جاڭادان جاساقتالىپ جۇمىسىن باستاعان ماجىلىستەن كۇتەرىمىز كوپ.
نۇرلان جۇماحان
"ادىرنا" ۇلتتىق پورتالى
