Mäjılıs sailauynyŋ dürkırep ötıp, halyq qalaulylarynyŋ jūmysqa kırıskenıne aiǧa juyqtap qaldy. Deputattyq mandatqa ie bolǧandar Mäjılıs mınberınen alǧaşqy deputattyq saualdaryn Ükımet müşelerıne joldap, Parlamentke kelgen bırlı-jarym ministrlerdı qaǧyp-sılkıp alǧanyna kuä boldyq.
Äzırşe Mäjılıstıŋ jaŋa qūramynyŋ qarqyny jaman emes. Osy baǧyttan ainymasa bolǧany.
Jalpy, ülken saiasi reformadan keiın jasaqtalǧan Mäjılıstıŋ qazırgı qūramyna qarap, qazaq tılı saiasattyŋ tılıne ainalǧanyn anyq baiqauǧa bolady. Bügınde özektı, ötkır dünielerdıŋ köpşılıgı qazaq tılınde aitylyp, qazaq tılınde söz bolyp jatyr.
Mäselen, osyǧan deiın “Samūryq-Qazyna” äl-auqat qoryn basqaryp, şalqyp-tasyp kün keşken su jaŋa Energetika ministrı Almasadam Sätqalievtı deputattar qazaq tılınde söileudı talap etkennen keiın ol köpşılık aldynda 6 aida qazaq tılın üirenıp, deputattar men jurnalisterdıŋ saualdaryna qazaq tılınde jauap beretının aityp, ant-su ıştı.
Endı 6 aidyŋ ötkenın kütemız.
Sätqalievtıŋ halyq aldynda uäde beruıne bırınşı kezekte deputattar, odan keiın jurnalistter qauymy da yqpal etkenı sözsız.
Osy rette Jaŋa Qazaqstannyŋ deputattary qoǧamdyq ömırde qany tamyp tūrǧan qandaida bır mäselelerdı jasqanbai aitatyn bolsa, ony jurnalister ılıp äketıp, älgı mäsele oŋ baǧytta şeşılmeiınşe, qoǧamdyq pıkırdı küşeitetın küşe ie ekenın osy joly taǧy da közımız jettı.Mūndai sätterde jurnalister qauymy da özderınıŋ qoǧamdyq-saiasi ömırde törtınşı bilıktıŋ ökılı ekenın sezınerı anyq. Osy tūrǧydan alǧanda deputattardyŋ özektı mäselelerdı qauzap, qoǧamdyq oidyŋ generatoryna ainaluy maŋyzdy ekenın baiqaisyŋ. Ras, Parlament qabyrǧasynda qoǧamdyq oidyŋ generatoryna ainalatyn deputattar bar. Olar – Baqytjan Bazarbek, Ermūrat Bapi, Qazybek İsa, Abzal Qūspanov jäne Rinat Zaitov. Osylardyŋ arasynda Baqytjan Bazarbektıŋ qarqyny köpşılıktıŋ quantyp otyrǧany anyq. Bügınde ol özı jyldar boiy köterıp jürgen jerdı zaŋsyz basyp alu mäselesı joǧary deŋgeide köterıp qazaq jerın bauyryna basyp alǧan latufindistterdıŋ ışkenın ırıŋ, jegenın jelım qyluǧa tas tüiın bekıngendei… Bäkeŋnıŋ osy baǧytta jūmys ıstegenın halyq ta qoldaidy. Būdan basqa Respublica partiiasynan deputattyq mandatqa ie bolǧan qyz-jıgıtter de öz partiialarynyŋ qoǧamdyq-saiasi ömırde tanymaldyǧy artuy üşın özektı mäselelerdı köterıp saiasattyŋ körkın qyzdyratynyna senımdımız. Sonymen qatar “Aq jol” partiiasy da saiasi bäsekeden qalmai batyl bastamalardy qolǧa alyp, sailauşylardyŋ köŋılınen şyǧuǧa baryn salatyny anyq.
Parlamenttegı osydai äreketterdı körgennen keiın boiyna artyq salmaq jinaǧan AMANAT partiiasy da salmaǧynan aiyrylyp, yldym-jyldym şūǧyl äreketke beiımdeluıne tura keledı.Osyǧan deiın qalǧyp-mülgıp otyrǧan AMANAT-tyŋ eskı qūramy qatarlaryn jaŋadan qosylǧan Baqytjan Bazarbek syndy ärıptesterımen sinhrondy türde jūmys ısteuge mäjbür. Sondyqtan jaŋadan jasaqtalyp jūmysyn bastaǧan Mäjılısten küterımız köp.
Nūrlan JŪMAHAN
"Adyrna" ūlttyq portaly
Ūqsas jaŋalyqtar
