قازاقستان وكىلدەرى تىيىم سالىنسا دا اۋعانستاندا بيلىك قۇرىپ وتىرعان تاليبان (قازاقستاندا تىيىم سالىنعان ۇيىم) اكىمشىلىگى وكىلدەرىمەن كەزدەستى. بۇل تۋرالى قازاقستان سىرتقى ىستەر مينيسترلىگىنىڭ رەسمي وكىلى ايبەك سمادياروۆ Facebook پاراقشاسىندا جاريالادى، دەپ حابارلايدى “ادىرنا” ۇلتتىق پورتالى.
“كەشە پرەمەر-ءمينيستردىڭ ورىنباسارى – ساۋدا ءمينيسترى سەرىك جۇمانعارين باستاعان قازاقستاندىق دەلەگاتسيا اۋعانستان استاناسى – كابۋل قالاسىندا بولدى. اۋعانستان حالقىنا گۋمانيتارلىق كومەك جەتكىزۋ سالتاناتتى ءراسىمى وتكەن.
بۇل مەملەكەت باسشىسىنىڭ تاپسىرماسى بويىنشا جاسالدى. وتكەن ساپار مەن گۋمانيتارلىق كومەك تۋرالى تولىعىراق اقپارات ساۋدا مينيسترلىگىنىڭ رەسمي حابارلامارىندا بەرىلەدى”،- دەپ جازدى ايبەك سمادياروۆ.
سونىمەن قاتار، كابۋلدا قازاقستان جانە اۋعانستان كاسىپكەرلەرىنىڭ كەزدەسۋى ءوتىپ، ارنايى ساۋدا بيزنەس-فورۋمى ۇيىمداستىرىلعان. سمادياروۆتىڭ ايتۋىنشا، بيزنەسمەندەردىڭ كوڭىل-كۇيىنە قاراعاندا وتە ءساتتى بولعان.
ودان بولەك، جاقىن ارادا اۋعانستاندا قازاقستاننىڭ ساۋدا ءۇيى اشىلماق.
“بۇۇ حالىق قورىنىڭ باعالاۋى بويىنشا اۋعانستان حالقى شامامەن 40 ملن ادامدى قۇرايدى. ارينە بۇل ءبىزدىڭ وندىرۋشىلەر ءۇشىن وتە تارتىمدى ءارى قىزىق نارىق. تەك 2022 جىلدىڭ وزىندە اۋعاندارمەن ەكىجاقتى ساۋدا كولەمى رەكوردتىق كورسەتكىشكە — 987,9 ميلليون دوللارعا جەتتى، بۇل وتكەن جىلمەن سالىستىرعاندا 2,1 ەسەگە ارتتى. ساۋدانىڭ ارتۋى، ەڭ الدىمەن، وتاندىق ءونىم ەكسپورتىنىڭ ءوسۋىنىڭ ارقاسىندا بولعان جاعداي. ال بيىل قازاقستاندا وندىرىلگەن تاۋارلاردى ەكسپورتتاۋ ەسەبىنەن 1 ملرد دوللاردى ەڭسەرۋ تۋرالى سەنىممەن ايتۋعا بولادى. نەگىزىنەن كاسىپكەرلەرىمىز بۇل ەلگە بيداي نەمەسە بيداي-قارا بيداي ۇنى، بيداي، كەپتىرىلگەن بۇرشاق كوكونىستەرى، لەگيرلەنبەگەن بولاتتان جاسالعان جالپاق پروكات، تەمىرجول لوكوموتيۆتەرى، زىعىر تۇقىمدارى مەن كۇنباعىس مايىن ەكسپورتتايدى.
حالىقارالىق قاۋىمداستىق اۋعانستانداعى ەكونوميكالىق كۇيرەۋگە، گۋمانيتارلىق داعدارىسقا جول بەرمەۋ كەرەك دەگەن ورتاق تۇسىنىككە يە بولعاندىقتان، ءبىز بۇل ەلمەن ساۋدا-ەكونوميكالىق بايلانىستاردى قالپىنا كەلتىرىپ، دامىتۋىمىز كەرەك. ەكونوميكالىق ىنتىماقتاستىق سالاسىندا، قازاقستان مەن اۋعانستان اراسىنداعى، اسىرەسە ورتالىق جانە وڭتۇستىك ازياداعى ينتەگراتسيالىق ۇدەرىستەر سالاسىنداعى قارىم-قاتىناستاردى دامىتۋ ۆەكتورلارىنىڭ ءبىرى رەتىندە ينفراقۇرىلىمدىق جوبالاردى ىسكە اسىرۋدىڭ ماڭىزدىلىعىن اتاپ وتكەن ءجون ”، - دەپ جازدى ايبەك سمادياروۆ
سونداي-اق، ول ءبىر جارىم جىل بۇرىن اۋعانستانعا بارعان ساپارىن ەسكە الدى.
“اۋعاندىقتاردىڭ داستارحانىنداعى قازاق ونىمدەرى ساپا مەن تاماشا ءدامنىڭ بەلگىسى بولىپ سانالادى ەكەن. شوكولادتار، كامپيتتەر مەن تاتتىلەر ەرەكشە باعالانادى. قازاقتىڭ ۇنىنان جاسالعان نان تۋرالى ايتىپ تا قاجەتى جوق، ول بارلىق ۇيدە دەرلىك بار”،- دەدى سمادياروۆ.
ەسكە سالايىق، 2021 جىلى 17 قازاندا قازاقستاندىق دەلەگاتسيا تاليبان (قازاقستاندا تىيىم سالىنعان ۇيىم) قوزعالىسىنىڭ جەتەكشىلەرىمەن كەزدەسكەن بولاتىن. سول كەزدە سىرتقى ىستەر مينيسترلىگىنىڭ ءباسپاسوز حاتشىسى ايبەك سمادياروۆ Facebook پاراقشاسىنا ەكى قارۋلى ادامنىڭ (قازاقستان ەلشىلىگىن كۇزەتىپ تۇرعان تالىپتەر) اراسىندا تۇرعان سۋرەتىن جاريالاعان ەدى.
