مەملەكەت باسشىسى قاسىم-جومارت توقاەۆ ەلوردادا بەيبەرەكەت قۇرىلىس سالۋ ماسەلەسىن ورىندى سىنايدى. ماسەلەن، استانانى دامىتۋ جونىندەگى كەڭەستە پرەزيدەنت بالاباقشا مەن مەكتەپتەردەگى ورىن تاپشىلىعىنا، سونداي-اق رۇقساتى جوق قۇرىلىس نىساندارىنا بەكەر توقتالعامادى.
«ءتورت مىڭعا جۋىق ۇلەسكەردىڭ ماسەلەسى ءالى كۇنگە دەيىن كۇن تارتىبىنەن تۇسپەي تۇر. اكىمدىك پەن ۇكىمەت بۇل ماسەلەنى جىلدىڭ سوڭىنا دەيىن شەشۋگە ءتيىس. سونىمەن قاتار زاڭنامالىق بازانىڭ وسالدىعى سالدارىنان قالادا جاڭا تۇيتكىلدى نىساندار پايدا بولۋى مۇمكىن. قازىر استانادا رۇقسات ەتىلگەن قۇجاتتارى جوق 90-نان استام تۇرعىن ءۇيدىڭ قۇرىلىسى ءجۇرىپ جاتىر. قۇرىلىس كومپانيالارى جاي عانا ماردىمسىز ايىپپۇل تولەپ، ازاماتتاردان اقشا تارتۋىن قويار ەمەس. ۇكىمەت مەملەكەتتىك رەتتەۋ شارالارىن قاتاڭداتقانى ءجون. قۇرىلىس كومپانيالارىنىڭ زاڭدى بەلدەن باسىپ، ۇلەسكەرلەردەن اقشا تارتۋىنا جول بەرۋگە بولمايدى. بۇل جۇمىسقا قارجىلىق مونيتورينگ اگەنتتىگى اتسالىسۋعا ءتيىس،» – دەدى ول.
ەندى ءدال سونداي وتكىر ماسەلە كۇن تارتىبىنە شىقتى. «G-Park» كومپانياسى (ەنشىلەس كومپانياسى «Stroy Group kz - 2021» جاۋاپكەرشىلىگى شەكتەۋلى سەرىكتەستىگى) «Dublin» تۇرعىن ءۇي كەشەنىندەگى قۇرىلىستى ەشبىر قۇجاتسىز باستاپ كەتكەن. سونىڭ كەسىرىنەن عيمارات سالىنىپ جاتقان جەردىڭ استىنان جىلۋ ماگيسترالى وتە الماي تۇرالاپ تۇر. استانا قالاسىنىڭ اكىمدىگى «ۆد ستروي-ينجينيرينگ» جاۋاپكەرشىلىگى شەكتەۋلى سەرىكتەستىگىنە 2023-2024 جج. جىلىتۋ ماۋسىمى باستالعانشا جىلۋ ماگيسترالدىق جوباسىن ۋاقىتىلى اياقتاۋ مىندەتتەگەن. ال زاڭسىز عيماراتتى اينالىپ ءوتۋ دە مۇمكىن ەمەس. جوبالىق-سمەتالىق قۇجاتتاما تالاپتارىنا ساي اتالعان ۋچاسكەدە جىلۋ تراسساسىن توسەۋ بويىنشا قۇرىلىس-مونتاجداۋ جۇمىستارىن جالعاستىرۋ مۇمكىن ەمەس. مۇنى مەملەكەت باسشىسىنىڭ قورعالجىن تاس جولى بويىنشا گاز جىلۋ ستانتسياسىن ىسكە قوسۋ جانە استانا قالاسىندا جىلۋ ەنەرگياسىنىڭ تاپشىلىعىن تومەندەتۋ جونىندەگى تاپسىرماسىنا نەمقۇرايلى قاراۋ دەپ تۇسىنۋگە بولادى.
وسىعان بايلانىستى، 2023 جىلعى 14 اقپاندا «استانا قالاسىنىڭ وتىن-ەنەرگەتيكالىق كەشەنى جانە كوممۋنالدىق شارۋاشىلىق باسقارماسى» مەملەكەتتىك مەكەمەسى «G-Park» كومپانياسىنىڭ ەنشىلەس ۇيىمى «Stroy Group kz-2021» جاۋاپكەرشىلىگى شەكتەۋلى سەرىكتەستىگىنە جىلۋ تراسساسى ۋچاسكەسىندەگى زاڭسىز سالىنعان «Dublin» تۇرعىن ءۇي كەشەنىن بۇزۋ تۋرالى استانا قالاسىنىڭ مامانداندىرىلعان اۋدانارالىق ەكونوميكالىق سوتىنا تالاپ ارىز بەرگەن.
2023 جىلعى 4 ساۋىردە سوت شەشىمىمەن تالاپ ارىز تولىق قاناعاتتاندىرىلدى. وسىلايشا «Stroy Group kz-2021» جاۋاپكەرشىلىگى شەكتەۋلى سەرىكتەستىگى ءوز ەسەبىنەن قۇرىلىستى بۇزۋعا مىندەتتەۋ تۋرالى شەشىم قابىلداندى. سوتتىڭ بۇل شەشىمى جەدەلدەتىلىپ ورىندالۋعا جىبەرىلدى.
الايدا، قىزىقتىڭ كوكەسى باسقاشا بولىپ تۇر. سوتتىڭ شەشىمى بولا تۇرا «G-Park» كومپانياسى «Dublin» تۇرعىن ءۇي كەشەنىن سالۋدى توقتاتۋدىڭ ورنىنا جانداندىرا تۇسكەن. ش.ايتماتوۆ پەن ج. مولداعاليەۆ كوشەلەرىنىڭ قيىلىسىنداعى عيماراتتىڭ ىرگەتاسىنا مونوليت قۇيۋ جۇمىستارى ءبىتىپ، ءبىرىنشى قاباتتىڭ كىرپىش كونسترۋكتسيالارى ءورىلىپ جاتىر. استانا قالاسىنىڭ گەواقپاراتتىق ورتالىعىنىڭ مالىمەتىنشە، تۇرعىن ءۇي كەشەنىنىڭ ىرگەتاسى قۇيىلعان جەردىڭ نىسانالى ماقساتى دەنە شىنىقتىرۋ-ساۋىقتىرۋ كەشەنىن سالۋ ءۇشىن بەرىلگەن.دەمەك، قۇرىلىس كومپانياسى نىسانالى ماقساتقا كوز جۇما قاراعان.
«Dublin» تۇرعىن ءۇي كەشەنىنىڭ قۇرىلىسى بىلتىر جاندانعان. الايدا، ونىڭ باستالعانى تۋرالى حابارلاما جىبەرىلمەگەن، جەر ۋچاسكەسىنە ءتيىستى قۇقىق، زاڭنامادا بەلگىلەنگەن ساراپتامادان وتكەن جوبالىق قۇجات، اۆتورلىق جانە تەحنيكالىق قاداعالاۋ سەكىلدى شارتتاردىڭ بىردە-ءبىرى جاسالماعان. وسىلايشا، قولدانىستاعى زاڭنامانىڭ تالاپتارى ورەسكەل بۇزىلىپ، ءوز بەتىنشە قۇرىلىس سالۋعا كىرىسىپ كەتكەن.
سونداي-اق، قۇرىلىس كومپانياسى كۇللى اقپارات پەن جاعدايدى بىلە تۇرىپ، باسپانانىڭ سالۋىن توقتاماعانىن ەسكەرسەك، بۇل بولاشاقتا ۇلەسكەرلەر اراسىندا الەۋمەتتىك شيەلەنىستى تۋدىراتىنى انىق.
استانا قالاسىنىڭ مامانداندىرىلعان اۋدانارالىق ەكونوميكالىق سوتى «Stroy Group kz-2021» جاۋاپكەرشىلىگى شەكتەۋلى سەرىكتەستىگىنىڭ ءوز ەسەبىنەن قۇرىلىستى بۇزۋدى مىندەتتەدى. سوتتىڭ شەشىمى جەدەل جۇزەگە اسپاسا، ەسىل اۋدانىنداعى ءبىرشاما تۇرعىن ءۇي ەكىنشى ەكىباستۇزدىڭ كەبىن كيىپ، قىستى جىلۋسىز قارسى الۋ قاۋپى بار. «G-Park» كومپانياسىنىڭ جەكە مۇددەسى قاراپايىم حالىقتىڭ سورىنا اينالماسا يگى.
