Mäjılısmen Ermūrat Bäpi QR Bas prokurory Berık Asylovqa joldaǧan deputattyq saualynda Reseidı synap sottalǧan blogerlerdı bostandyqqa şyǧarudy talap ettı, dep habarlaidy “Adyrna” ūlttyq potaly.
"Petropavl qalasynda juyrda bolǧan separatizm sipatyndaǧy oǧaş oqiǧa Qazaqstandaǧy ūlttyq-jıkşıldık piǧyldyŋ öte qauıptı taqyryp ekenın taǧy bır ret körsettı. Būl - "Jaŋa Qazaqstan" ideiasyna qarsy baǧyttalǧan jäne oǧan tıkelei töngen qaterdıŋ bıregei belgısı dep baǧalau kerek", – dedı deputat.
Sondai-aq, ol el ışıne ırıtkı salu qoǧamnyŋ qatty alaŋdauşylyǧyn tuǧyzyp otyrǧanyn aitty.
"İä, el Konstitusiiasy men tiıstı memlekettık zaŋdar kez kelgen separatizmge qarsy tūra alady. Bıraq halyqtyq müddenıŋ qasiettın qorǧaityn "ūlttyq namys" dep atalatyn taǧy bır qūdırettı küş bar. Degenmen, bızdıŋ eldıŋ namysyn qorǧaǧan ūltjandy azamattar Marǧūlan Boranbaev pen Danat Namazbaev "ūltaralyq arazdyqty tudyrdy" degen jeleumen ärqaisysy 5 jylǧa sottalyp kettı. Anyǧynda, būl azamattar "ūltaralyq arazdyqtan" būryn, qazaq halqynyŋ namysyn "jyrtyp", ūlttyq müddenı qorǧap, äleumettık jelılerdegı separatistık közqarastarǧa qarsy şyqqany üşın sotty boldy. Būl jıgıtterge öreskel qiianat jasaldy", – dedı Bäpi.
Deputattyŋ pıkırınşe, körşıles elderdıŋ azamattary auzyna kelgenın aityp jäne jazyp jatqan alauyz pıkırlermen salystyrǧanda, M.Boranbaev pen D.Namazbaevtyŋ älemjelıdegı äreketı balanyŋ oiyny bolyp qaldy. Olarǧa jasalǧan qiianat pen ädıletsızdık osy salystyrudan tuyndaidy.
"Bır el nege özınıŋ syŋarezu saiasatşylaryna tyiym salmaidy, bızdıŋ el nege özınıŋ eldık müddesı men halyqtyq namysyn qorǧaǧan azamattaryn sottaidy? Olar nege "orys patriottary" bolyp sanalady, al öz halqynyŋ namysyn jyrtqan Marǧūlan men Danat nege qazaq halqynyŋ patriottary bola almaidy? Körşı eldıŋ "ūranşylary" qylmystyq sotqa tartylmaq tügılı, öz bilıgı men tiıstı organdary tarapynan äkımşılık tūrǧyda eskertu de alǧan joq. Al el namysyna araşa tüsken ekı jıgıt nege sotty bolady? Endeşe, būǧan deiın Qazaqstanda bolyp kelgen separatizm sindromyn jäne Petropavl qalasyndaǧy juyqta bolǧan jıkşıldenudıŋ jiırkenıştı jaǧdaiatyn eskere otyryp, Marǧūlan Boranbaev pen Danat Namazbaevqa qatysty ükımdı qaitadan qaraityn uaqyt ta, saiasi sebep te, ūlttyq qauıpsızdık mūqtajdyǧy da tudy dep esepteimın", – degen deputat Bas prokurorǧa qūzıretın paidalana otyryp, jaŋadan paida bolǧan jaǧdaiattarǧa säikes, Qazaqstannyŋ Joǧarǧy sotynan Marǧūlan Boranbaev pen Danat Namazbaevqa qatysty sot ükımın qaita qarauǧa, olardy türmeden bosatuǧa pärmen berudı sūrady.
Eske salsq, byltyr blogerler Marǧūlan Boranbai men Danat Namazbai Resei turaly jazbalary üşın 5 jylǧa sottaldy. Olar reseilık saiasatkerlerdıŋ Qazaqstan turaly pıkırlerıne qarsy öz oilaryn aşyq aitqan. Sonymen qatar Reseimen integrasiialyq bailanystyŋ damuyna qarsylyqtaryn bıldırgen. Ärı Resei äskerınıŋ Ukrainadaǧy ıs-äreketın de synǧa alǧan.
