رەسەي ۇكىمەتىنىڭ ىشكى قۇجاتتارى جەلىگە تاراپ كەتكەن. وندا ماسكەۋ باتىس ەلدەرىنىڭ ورتالىق ازياعا ىقپالى ارتىپ كەلە جاتقانىنا الاڭدايتىنى ايتىلعان، دەپ حابارلايدى “ادىرنا” ۇلتتىق پورتالى.
بۇل اقپاراتتى The Financial Times حابارلادى.
قۇجات 2024 جىلدىڭ ساۋىرىندە رەسەي پرەمەر-ءمينيسترى ميحايل ميشۋستين باسشىلىق ەتكەن ستراتەگيالىق سەسسيادا تانىستىرىلعان. جيىنعا ونداعان ۇكىمەت مۇشەسى مەن مەملەكەتتىك كورپوراتسيالاردىڭ باسشىلارى قاتىسقان.
قۇجاتتا ۋكرايناداعى سوعىستىڭ رەسەي مەن ورتالىق ازيا ەلدەرى اراسىنداعى قارىم-قاتىناسقا اسەرى قاراستىرىلعان. ماسكەۋ باتىس سانكتسيالارى رەسەي مەن ونىڭ سەرىكتەستەرى اراسىنداعى بايلانىستى السىرەتىپ جاتقانىن مويىندايدى.
كرەمل ەۋرازيالىق ساۋدا بلوگىنىڭ ورتالىعى بولۋدى كوزدەيدى جانە “ماكروايماق” قۇرۋدى ستراتەگيالىق ماقسات رەتىندە قاراستىرادى. ماسكەۋ بۇل ايماقتى اقش، ەو جانە قىتايعا قارسى ەكونوميكالىق باسەكەلەس كۇشكە اينالدىرعىسى كەلەدى.
الايدا رەسەي ورتالىق ازيا ەلدەرىن ءوز ىقپالىندا ۇستاپ قالۋدىڭ وڭاي ەمەستىگىن تۇسىنەدى. قۇجاتتا باتىس ەلدەرى “جازا جانە سىياقى” ءادىسىن قولدانىپ، ايماق ەلدەرىنىڭ رەسەيگە تاۋەلدىلىگىن ازايتۋعا كومەكتەسىپ جاتقانى جازىلعان.
“باتىس ەلدەرى بۇل مەملەكەتتەرگە رەسەيدەن تاۋەلسىز كولىك دالىزدەرى مەن جاھاندىق نارىقتارعا قول جەتكىزۋگە مۇمكىندىك بەردى. سونىمەن قاتار، رەسەيدەن قونىس اۋدارعان بيزنەس پەن شەتەلدىك كومپانيالاردىڭ كوشۋىنەن قازاقستان مەن باسقا ەلدەر ەكونوميكالىق پايدا كورىپ وتىر،” – دەلىنگەن باياندامادا.
قۇجاتتا قازاقستان ەرەكشە اتالعان. ماسكەۋ قازاقستاننىڭ رەسەي-ۋكراينا سوعىسىنا قارسى ەكەنىن، رەسەيدىڭ وككۋپاتسيالانعان اۋماقتارىن مويىنداماعانىن جانە باتىس سانكتسيالارىن ساقتاۋعا تىرىساتىنىن اتاپ وتكەن.
كرەمل ورتالىق ازيامەن بايلانىسىن نىعايتۋ ءۇشىن “ۇزاق مەرزىمدى ويىن” جۇرگىزەتىنىن كورسەتكەن. رەسەي ايماق ەلدەرىمەن ورتاق تاريحتى العا تارتىپ، “تاۋەلسىزدىگىنە قۇرمەت كورسەتەتىنىن” كورسەتۋگە تىرىساتىنى جازىلعان.
قۇجاتتا بەلارۋس مىسال رەتىندە كەلتىرىلگەن. ماسكەۋ بۇل ەلدىڭ ەكونوميكالىق ارتاراپتاندىرۋعا تىرىسقانىنا قاراماستان، اقىرىندا رەسەيمەن بىرگە بولاتىنىن تۇسىنگەنىن كورسەتەدى.
جەلىگە تاراعان قۇجاتتا ەۋرازيالىق ەكونوميكالىق وداقتىڭ (ەاەو) “جۇيەلى پروبلەمالارعا” تاپ بولعانى دا اتاپ وتىلگەن. ولاردىڭ قاتارىندا سانكتسيالىق تاۋەكەلدەر مەن تولەم جۇيەلەرىندەگى قيىندىقتار بار.
سونىمەن قاتار، قازاقستانداعى العاشقى اەس قۇرىلىسى رەسەيدىڭ ىقپالىن كۇشەيتۋگە ارنالعان قۇرالداردىڭ ءبىرى رەتىندە قاراستىرىلعان. قۇجاتتا “روساتوم” بۇل جوباعا ەرەكشە قىزىعۋشىلىق تانىتىپ وتىر” دەلىنگەن.
ال رەسەي ۇكىمەتى The Financial Times-تىڭ بۇل قۇجاتقا قاتىستى سۇراعىنا جاۋاپ بەرمەگەن.
