Áleýmettik jeliler men messendjerlerde zeınetaqy tólemderin qaıta esepteý arqyly 30-50% arttyrý týraly shyndyqqa janaspaıtyn aqparat tarady. Eńbek jáne halyqty áleýmettik qorǵaý mınıstrligi bul habardy joqqa shyǵaryp, málimdeme jasady, dep habarlaıdy "Adyrna" ulttyq portaly.
Taratylǵan beınerolıkte zeınetaqyny arttyrý úshin 20 jyldan asatyn eńbek ótili jáne eńbek kitapshasynda belgili bir jazba bolýy kerek ekendigi baıandalady.
Keıinnen rolıktiń avtory tolyqqandy málimet alý úshin siltemege ótýdi suraıdy. Resmı emes aqparatqa qatysty Eńbek jáne halyqty áleýmettik qorǵaý mınıstrligi túsinikteme berdi:
«Azamattarǵa tekserilmegen siltemege kirmeý, sonymen qatar alaıaqtar paıdalana alatyn kúmándi ınternet-resýrstarda ózderiniń jeke derekterin qaldyrmaýǵa keńes beremiz. Aqparatty tek resmı kózderden paıdalanýdy suraımyz»,– dep eskertedi mınıstrlik.
"Adyrna" ulttyq portaly
