قازاقستاننىڭ بۇرىنعى پرەزيدەنتى نۇرسۇلتان نازارباەۆتىڭ ۇلكەن قىزى داريعا نازارباەۆانىڭ قۇداسى، كاسىپكەر قايرات بورانباەۆ 8 جىلعا سوتتالدى. ول تاعىلعان ايىپتى مويىنداماعان. قايرات بورانباەۆتىڭ مۇلكى تاركىلەنىپ، ءومىر بويىنا مەملەكەتتىك قىزمەت اتقارۋ قۇقىعىنان ايىرىلدى. سونىمەن قاتار، سەگىز جىلعا باس بوستاندىعىنا بۇعاۋ سالىندى. جازا مەرزىمى ورتاشا قاۋىپسىزدىكتەگى تۇزەۋ مەكەمەسىندە وتەلمەك.
"قر قىلمىستىق كودەكسى 58-بابىنىڭ 3-بولىگىنە سايكەس بورانباەۆ، ناحانوۆتىڭ مۇلكىن تاركىلەپ، 8 جىلعا باس بوستاندىعىنان ايىرۋ تۇرىندەگى جازا تاعايىندالسىن. ولار ءومىر بويى مەملەكەتتىك قىزمەتتە، سوتتا، جەرگىلىكتى ءوزىن-ءوزى باسقارۋ ورگاندارىندا، ۇلتتىق بانك پەن وعان قاراستى ۆەدومستۆولاردا، قارجى نارىعىن رەتتەۋ، باقىلاۋ جانە قاداعالاۋ جونىندەگى ۋاكىلەتتى ورگاندا قىزمەت اتقارۋ قۇقىعىنان ايرىلسىن. سونىمەن قاتار، قارجى ۇيىمدارىندا، مەملەكەتتىك ۇيىمداردا، كۆازيمەملەكەتتىك سەكتور سۋبەكتىلەرىندە قىزمەت ەتۋگە دە تىيىم سالىنادى", - دەدى سۋديا نازگۇل باپاقوۆا.
سونىمان قاتار، بىرقاتار ماراپاتتاردان ماقۇرىم قالاتىن بولدى.
"پرەزيدەنتتىڭ اتىنا مەملەكەتتىك ناگرادالارىنان ايىرۋ تۋرالى ۇسىنىس ەنگىزىلسىن", - دەپ مالىمدەدى استانا قالاسى سارىارقا اۋدانىنىڭ No2 اۋداندىق سوتىنىڭ سۋدياسى نازگۇل باپاقوۆا.
2022 جىلعى 26 جەلتوقساندا قارجى مونيتورينگى اگەنتتىگى «ازياگازچۋندجا» جشس قۇرىلتايشىلارى قايرات بورانباەۆ پەن رومان ناحانوۆقا، سونداي-اق «Qazaq Gaz» اق باسقارما توراعاسىنىڭ بۇرىنعى ورىنباسارى تايىر جانۇزاققا قاتىستى قىلمىستىق ءىستى تەرگەۋدى اياقتادى. سوتتالۋشىلار سۇيىتىلعان مۇناي گازىن ساتىپ الۋ جانە قىلمىستىق جولمەن الىنعان اقشانى زاڭداستىرۋ كەزىندە 14,5 ميلليارد تەڭگە جىمقىردى دەگەن كۇدىكپەن قۇرىققا ءتۇستى.
ءىس بويىنشا سوت وتىرىسى استانادا 30 جەلتوقساندا باستالدى.
سوتتالعان قايرات بورانباەۆ پەن «ازياگازچۋندجا» جشس-ءنىڭ ەكىنشى قۇرىلتايشىسى رومان ناحانوۆقا سەنىپ تاپسىرىلعان مۇلىكتى جىمقىردى جانە زاڭسىز اقشا مەن مۇلىكتى زاڭداستىرۋ، قىلمىسقا قاتىسى بار دەگەن ايىپتار تاعىلىپ وتىر.
28 ناۋرىزدا پروكۋرور قايرات بورانباەۆتى مۇلكىن تاركىلەۋمەن بىرگە 8 جىلعا باس بوستاندىعىنان ايىرۋدى سۇراعان.
ەسكە سالا كەتەيىك، قاڭتار وقيعاسىنان كەيىن نازارباەۆتىڭ تۋىستارى جاۋاپقا تارتىلا باستادى. سونىڭ ىشىندە بۇرىنعى پرەزيدەنتتىڭ قۇداسى قايرات بورانباەۆ 8 جىلعا سوتتالدى. ال نۇرسۇلتان نازارباەۆتىڭ نەمەرە ءىنىسى قايرات ساتىبالدى “قازاقتەلەكوم” اق-نىڭ اسا ءىرى كولەمدەگى قارجىسىن جىمقىرۋ جانە قىزمەتىن اسىرا پايدالانۋ فاكتىسى بويىنشا 6 جىلعا باس بوستاندىعىنان ايىرىلدى.
"ادىرنا" ۇلتتىق پورتالى
