Nazarbaevtardyń qudasy Qaırat Boranbaev 8 jylǵa sottaldy

1965
Adyrna.kz Telegram
2023 jyl, 31 naýryzda Astana qalasyndaǵy №2 Saryarqa sotynda iri kásipker Qaırat Boranbaevqa qatysty úkim shyqty, dep habarlaıdy "Adyrna" ulttyq portaly Zakon.kz-ke silteme kórsete otyryp. 

Qazaqstannyń burynǵy prezıdenti Nursultan Nazarbaevtyń úlken qyzy Darıǵa Nazarbaevanyń qudasy, kásipker Qaırat Boranbaev 8 jylǵa sottaldy. Ol taǵylǵan aıypty moıyndamaǵan.  Qaırat Boranbaevtyń múlki tárkilenip, ómir boıyna memlekettik qyzmet atqarý quqyǵynan aıyryldy.  Sonymen qatar, segiz jylǵa bas bostandyǵyna buǵaý salyndy. Jaza merzimi ortasha qaýipsizdiktegi túzeý mekemesinde ótelmek.

"QR Qylmystyq kodeksi 58-babynyń 3-bóligine sáıkes Boranbaev, Nahanovtyń múlkin tárkilep, 8 jylǵa bas bostandyǵynan aıyrý túrindegi jaza taǵaıyndalsyn. Olar ómir boıy memlekettik qyzmette, sotta, jergilikti ózin-ózi basqarý organdarynda, Ulttyq bank pen oǵan qarasty vedomstvolarda, Qarjy naryǵyn retteý, baqylaý jáne qadaǵalaý jónindegi ýákiletti organda qyzmet atqarý quqyǵynan aırylsyn. Sonymen qatar, qarjy uıymdarynda, memlekettik uıymdarda, kvazımemlekettik sektor sýbektilerinde qyzmet etýge de tyıym salynady", - dedi sýdıa Nazgúl Bapaqova.

Sonyman qatar, birqatar marapattardan maqurym qalatyn boldy.

"Prezıdenttiń atyna memlekettik nagradalarynan aıyrý týraly usynys engizilsin", - dep málimdedi Astana qalasy Saryarqa aýdanynyń No2 aýdandyq sotynyń sýdıasy Nazgúl Bapaqova.

2022 jylǵy 26 jeltoqsanda Qarjy monıtorıngi agenttigi «AzııaGazChýndja» JShS quryltaıshylary Qaırat Boranbaev pen Roman Nahanovqa, sondaı-aq «Qazaq Gaz» AQ basqarma tóraǵasynyń burynǵy orynbasary Taıyr Januzaqqa qatysty qylmystyq isti tergeýdi aıaqtady. Sottalýshylar suıytylǵan munaı gazyn satyp alý jáne qylmystyq jolmen alynǵan aqshany zańdastyrý kezinde 14,5 mıllıard teńge jymqyrdy degen kúdikpen quryqqa tústi.

Is boıynsha sot otyrysy Astanada 30 jeltoqsanda bastaldy.

Sottalǵan Qaırat Boranbaev pen  «AzııaGazChýndja» JShS-niń ekinshi quryltaıshysy Roman Nahanovqa senip tapsyrylǵan múlikti jymqyrdy jáne zańsyz aqsha men múlikti zańdastyrý, qylmysqa qatysy bar degen aıyptar taǵylyp otyr.

28 naýryzda prokýror Qaırat Boranbaevty múlkin tárkileýmen birge 8 jylǵa bas bostandyǵynan aıyrýdy suraǵan.

Eske sala keteıik, Qańtar oqıǵasynan keıin Nazarbaevtyń týystary jaýapqa tartyla bastady. Sonyń ishinde burynǵy prezıdenttiń qudasy Qaırat Boranbaev 8 jylǵa sottaldy. Al Nursultan Nazarbaevtyń nemere inisi Qaırat Satybaldy  “Qazaqtelekom” AQ-nyń asa iri kólemdegi qarjysyn jymqyrý jáne qyzmetin asyra paıdalaný faktisi boıynsha 6 jylǵa bas bostandyǵynan aıyryldy.

"Adyrna" ulttyq portaly 

Pikirler