بۇگىن «تەڭ قوعام» الەۋمەتتىك قولداۋ ورتالىعىندا «ناۋرىز – مەرەكەم، ناۋرىز – بەرەكەم» اتتى مەرەكەلىك ءىس-شارا ءوتتى. ۇلىستىڭ ۇلى كۇنى ناۋرىز مەيرامى قارساڭىندا ورتالىق ءوز كەلۋشىلەرىن ۇلتتىق مەرەكەمەن قۇتتىقتاپ، داستارحان جايدى. ەڭبەك جانە الەۋمەتتىك قورعاۋ كوميتەتى شىمكەنت قالاسى بويىنشا دەپارتامەنتىنىڭ باسشىسى باحتيار ونەرباەۆ، شىمكەنت قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ باسشىسى بالمارجان ناربەكوۆا قوناقتاردى ءاز-ناۋرىزبەن قۇتتىقتاپ، اقجارما تىلەگىن جەتكىزدى.
الەۋمەتتىك قولداۋ ورتالىعىندا ازاماتتارعا كەشەندە بەس باعىتتا قىزمەت كورسەتىلەدى. مۇندا وتكەن جىلى مۇگەدەكتىگى بار 9 مىڭعا جۋىق ازاماتقا كومەك كورسەتىلگەن. مەكەمە قىزمەتىن تۇراقتى الاتىن ازاماتتىڭ ءبىرى – بورىبەك قابىلبەكۇلى.
–ورتالىق 2021 جىلى اشىلدى. سودان بەرى، الەۋمەتتىك قولداۋ بويىنشا قاجەتتى كەڭەستەردى وسى جەردەن الامىن. ينۆاتاكسيگە ءوتىنىش بەرەمىز، بارلىق سالا تسيفرلاندىرۋ جۇيەسىنە كوشىپ جاتقاندىقتان ەگوۆ-تا قىزمەت الۋدى ۇيرەندىك. مەكەمەنىڭ ەكىنشى قاباتىندا ءتۇرلى ۇيىرمەلەر بار. مىسالى، ءان دومبىرا، كىتاپحانا، توقىما توقۋ، ارت-سۋرەت سالۋ ۇيىرمەلەرى جۇمىس ىستەيدى. بوس ۋاقىتىمىزدى كوبىنەسە وسى جەردە وتكىزەمىز. بۇگىنگى مەرەكەلىك ءىس-شارا كوڭىلىمىزدى كوتەردى. ۇيىمداستىرۋشىلارعا العىسىمىز شەكسىز، -دەيدى ب.قابىلبەكۇلى.
مەرەكەلىك ءىس-شارادا وڭتۇستىككە تانىمال ونەرپازدار ءان ايتىپ، بي بيلەدى. ال ورتالىق قىزمەتكەرلەرى ۇلتتىق تاعامدارىن ۇسىندى.
ايتا كەتەيىك، ورتالىقتا جۇمىسقا ورنالاسۋ جانە قۇقىقتىق، پسيحولوگيالىق كەڭەستەر جۇزەگە اسىرىلادى. سونداي-اق، ورتالىق ەڭبەك جانە مۋزىكا تەراپياسى، كىتاپحانا، پسيحولوگيا كابينەتتەرىمەن تولىققان.
