Búgin «Teń Qoǵam» áleýmettik qoldaý ortalyǵynda «Naýryz – merekem, Naýryz – berekem» atty merekelik is-shara ótti. Ulystyń uly kúni Naýryz meıramy qarsańynda ortalyq óz kelýshilerin ulttyq merekemen quttyqtap, dastarhan jaıdy. Eńbek jáne áleýmettik qorǵaý komıteti Shymkent qalasy boıynsha departamentiniń basshysy Bahtııar Ónerbaev, Shymkent qalasy jumyspen qamtý jáne áleýmettik qorǵaý basqarmasynyń basshysy Balmarjan Narbekova qonaqtardy áz-Naýryzben quttyqtap, aqjarma tilegin jetkizdi.
Áleýmettik qoldaý ortalyǵynda azamattarǵa keshende bes baǵytta qyzmet kórsetiledi. Munda ótken jyly múgedektigi bar 9 myńǵa jýyq azamatqa kómek kórsetilgen. Mekeme qyzmetin turaqty alatyn azamattyń biri – Bóribek Qabylbekuly.
–Ortalyq 2021 jyly ashyldy. Sodan beri, áleýmettik qoldaý boıynsha qajetti keńesterdi osy jerden alamyn. Invataksıge ótinish beremiz, barlyq sala ıfrlandyrý júıesine kóship jatqandyqtan Egov-ta qyzmet alýdy úırendik. Mekemeniń ekinshi qabatynda túrli úıirmeler bar. Mysaly, án dombyra, kitaphana, toqyma toqý, art-sýret salý úıirmeleri jumys isteıdi. Bos ýaqytymyzdy kóbinese osy jerde ótkizemiz. Búgingi merekelik is-shara kóńilimizdi kóterdi. Uıymdastyrýshylarǵa alǵysymyz sheksiz, -deıdi B.Qabylbekuly.
Merekelik is-sharada ońtústikke tanymal ónerpazdar án aıtyp, bı bıledi. Al ortalyq qyzmetkerleri ulttyq taǵamdaryn usyndy.
Aıta keteıik, ortalyqta jumysqa ornalasý jáne quqyqtyq, psıhologııalyq keńester júzege asyrylady. Sondaı-aq, ortalyq eńbek jáne mýzyka terapııasy, kitaphana, psıhologııa kabınetterimen tolyqqan.
