بۇگىن قمدب شىمكەنت وكىلدىگى قالا اكىمدىگىمەن بىرلەسە كەزەكتى «رامازان قورجىنى» قايىرىمدىلىق اكتسياسىن ۇيىمداستىردى. ىزگىلىك اكتسياسى اياسىندا قالانىڭ ورتالىق مەشىتى – اقمەشىتتە الەۋمەتتىك از قامتىلعان وتباسىلارعا ازىق-تۇلىك جيىنتىعى تاراتىلدى.
–رامازان – مەيىرىمدىلىك پەن قايىرىمدىلىق ايى. جىلداعى ءداستۇر بويىنشا قاسيەتتى اي باستالعاننان وسىنداي قايىرلى ءىستى قولعا الىپ وتىرمىز. بۇگىن شىمكەنت قالاسىنىڭ اكىمدىگىمەن بىرلەسە 500 وتباسىعا اۋىزاشار ءۇشىن ازىق-تۇلىك سەبەتى ۇلەستىرىلدى. ودان بولەك، كۇن سايىن قالاداعى 40 مەشىتتە كاسىپكەرلەردىڭ قولداۋىمەن تۇرعىندارعا اۋىزاشار ۇيىمداستىرىلۋدا. وسىنداي ىزگى ىستەردە بەلسەندىلىك تانىتقان كاسىپكەرلەر مەن مەشىت يمامدارىنا العىس ايتامىن، - دەدى قالانىڭ باس يمامى باقداۋلەت ءابدىراحمانوۆ.
اۋىزاشارعا ارنالعان ازىق-تۇلىك قورابىن العان اباي اۋدانىنىڭ تۇرعىنى، كوپبالالى انا تۇرسىناي جۇمانوۆا قايىرىمدىلىق اكتسياسىنا قولداۋ بىلدىرگەن قالا اكىمدىگى مەن مەشىت يمامدارىنا ءوز العىسىن جەتكىزدى.
–بۇگىن العاش رەت مەشىتكە كەلىپ وسىنداي اۋىزاشار جيىنتىعىن الىپ وتىرمىز. رامازان ايىندا حالىققا ازىق-تۇلىك تاراتۋدى ۇيىمداستىرعان قالا اكىمدىگىنە، مەشىت يمامدارى مەن جومارت كاسىپكەرلەرگە كوپ راقمەت، - دەدى كوپبالالى انا.
«رامازان قورجىنى» قايىرىمدىلىق اكتسياسى 5 اۋداننىڭ ورتالىق مەشىتىندە كۇن سايىن ۇيىمداستىرىلىپ، 500 وتباسىنا ازىق-تۇلىك جيىنتىعى تاراتىلىپ جاتىر. ءىس-شارا اي سوڭىنا دەيىن جالعاسادى.
