Búgin QMDB Shymkent ókildigi qala ákimdigimen birlese kezekti «Ramazan qorjyny» qaıyrymdylyq akııasyn uıymdastyrdy. Izgilik akııasy aıasynda qalanyń ortalyq meshiti – Aqmeshitte áleýmettik az qamtylǵan otbasylarǵa azyq-túlik jıyntyǵy taratyldy.
–Ramazan – meıirimdilik pen qaıyrymdylyq aıy. Jyldaǵy dástúr boıynsha qasıetti aı bastalǵannan osyndaı qaıyrly isti qolǵa alyp otyrmyz. Búgin Shymkent qalasynyń ákimdigimen birlese 500 otbasyǵa aýyzashar úshin azyq-túlik sebeti úlestirildi. Odan bólek, kún saıyn qaladaǵy 40 meshitte kásipkerlerdiń qoldaýymen turǵyndarǵa aýyzashar uıymdastyrylýda. Osyndaı izgi isterde belsendilik tanytqan kásipkerler men meshit ımamdaryna alǵys aıtamyn, - dedi qalanyń bas ımamy Baqdáýlet Ábdirahmanov.
Aýyzasharǵa arnalǵan azyq-túlik qorabyn alǵan Abaı aýdanynyń turǵyny, kópbalaly ana Tursynaı Jumanova qaıyrymdylyq akııasyna qoldaý bildirgen qala ákimdigi men meshit ımamdaryna óz alǵysyn jetkizdi.
–Búgin alǵash ret meshitke kelip osyndaı aýyzashar jıyntyǵyn alyp otyrmyz. Ramazan aıynda halyqqa azyq-túlik taratýdy uıymdastyrǵan qala ákimdigine, meshit ımamdary men jomart kásipkerlerge kóp raqmet, - dedi kópbalaly ana.
«Ramazan qorjyny» qaıyrymdylyq akııasy 5 aýdannyń ortalyq meshitinde kún saıyn uıymdastyrylyp, 500 otbasyna azyq-túlik jıyntyǵy taratylyp jatyr. Is-shara aı sońyna deıin jalǵasady.
