بۇگىن شىمكەنتتە بيزنەس يدەياسىن ناعىز جوباعا اينالدىرعان كاسىپكەرلەردىڭ جارمەڭكەسى ءوتتى. كورمە ورتالىعىنا جينالعان 150-دەن اسا كاسىپكەر مەملەكەتتەن قايتارىمسىز گرانت الىپ، ناتيجەلى جۇمىسىنىڭ ارقاسىندا ءوز ونىمدەرى ارقىلى ەلىمىزدىڭ ەكونوميكاسىنىڭ دامۋىنا ۇلەس قوسىپ كەلەدى.
قالالىق جۇمىسپەن قامتۋ جانە الەۋمەتتىك قورعاۋ باسقارماسىنىڭ ۇيىتقى بولۋىمەن وتكەن جارمەڭكەگە شىمكەنت قالاسىنىڭ اكىمى مۇرات ايتەنوۆ قاتىستى. شاھار باسشىسى كاسىپ يەلەرىنىڭ جۇمىسىمەن ءجىتى تانىسىپ شىقتى.
–كورمەدەگى تاۋارلاردى جاساۋعا كاسىپكەرلەردىڭ بار ونەرىن، ىنتا-ىقىلاسىن سالعانى كورىنىپ تۇر. مەملەكەت ۇسىنعان گرانتتاردى كونكۋرس ارقىلى جەڭىپ العان قالا تۇرعىندارى ءوز بيزنەسىن باستاپ، ادەمى، ساپالى ءارى نارىقتا سۇرانىسقا يە تاۋارلاردى ءوندىرىپ جاتىر. بۇل ءبىر جاعىنان شىمكەنتىكتەردىڭ كاسىپكە بەيىم ءارى ەڭبەكقور ەكەنىن كورسەتسە، ەكىنشى جاعىنان مەملەكەتتىڭ شاعىن جانە ورتا بيزنەسكە كورسەتىپ جاتقان قولداۋىنىڭ ناقتى ناتيجەسى، - مۇرات دۇيسەنبەكۇلى.
جارمەڭكەدە تاعام ونەركاسىبى، كونديتەرلىك ءونىم، جيھاز ءوندىرۋ، قىزمەت كورسەتۋ سالالارى بويىنشا ءتۇرلى الەۋمەتتىك جوبالار قويىلدى. سونداي-اق ءىس-شاراعا جينالعان حالىققا ارنايى اقپاراتتىق بۇرىش جاساقتالىپ، «حالىقتى جۇمىسپەن قامتۋ ورتالىعىنىڭ» ماماندارى تەگىن كاسىبي وقۋ، تۇراقتى جۇمىسقا ورنالاسۋ، سۋبسيديالاناتىن جۇمىس ورىندارىنا جولداما الۋ بويىنشا كەلۋشىلەرگە اقپارات بەردى.
ايتا كەتەيىك، وتكەن جىلى قالامىزدا 1195 ادام جاڭا بيزنەس يدەيالاردى جۇزەگە اسىرۋعا قايتارىمسىز گرانتتاردى جەڭىپ العان. ال، 2392 ادام تەگىن كاسىبي وقۋعا جىبەرىلسە، بيىلعى جىلى بۇل جۇمىستار جالعاسىن تاۋىپ 2431 ادام وقۋعا جولدانىپتى. مەملەكەت تاراپىنان بەرىلەتىن قولداۋ شارالارى بيىل دا ءوز جالعاسىن تاۋىپ، شىمكەنت قالاسى بويىنشا 447 ادامعا 400 اەك دەيىنگى مولشەردە قايتارىمسىز گرانت بەرۋ جوسپارلانىپ وتىر.
