Búgin Shymkentte bıznes ıdeıasyn naǵyz jobaǵa aınaldyrǵan kásipkerlerdiń jármeńkesi ótti. Kórme ortalyǵyna jınalǵan 150-den asa kásipker memleketten qaıtarymsyz grant alyp, nátıjeli jumysynyń arqasynda óz ónimderi arqyly elimizdiń ekonomıkasynyń damýyna úles qosyp keledi.
Qalalyq Jumyspen qamtý jáne áleýmettik qorǵaý basqarmasynyń uıytqy bolýymen ótken jármeńkege Shymkent qalasynyń ákimi Murat Áıtenov qatysty. Shahar basshysy kásip ıeleriniń jumysymen jiti tanysyp shyqty.
–Kórmedegi taýarlardy jasaýǵa kásipkerlerdiń bar ónerin, ynta-yqylasyn salǵany kórinip tur. Memleket usynǵan granttardy konkýrs arqyly jeńip alǵan qala turǵyndary óz bıznesin bastap, ádemi, sapaly ári naryqta suranysqa ıe taýarlardy óndirip jatyr. Bul bir jaǵynan shymkentikterdiń kásipke beıim ári eńbekqor ekenin kórsetse, ekinshi jaǵynan memlekettiń shaǵyn jáne orta bızneske kórsetip jatqan qoldaýynyń naqty nátıjesi, - Murat Dúısenbekuly.
Jármeńkede taǵam ónerkásibi, kondıterlik ónim, jıhaz óndirý, qyzmet kórsetý salalary boıynsha túrli áleýmettik jobalar qoıyldy. Sondaı-aq is-sharaǵa jınalǵan halyqqa arnaıy aqparattyq burysh jasaqtalyp, «Halyqty jumyspen qamtý ortalyǵynyń» mamandary tegin kásibı oqý, turaqty jumysqa ornalasý, sýbsıdııalanatyn jumys oryndaryna joldama alý boıynsha kelýshilerge aqparat berdi.
Aıta keteıik, ótken jyly qalamyzda 1195 adam jańa bıznes ıdeıalardy júzege asyrýǵa qaıtarymsyz granttardy jeńip alǵan. Al, 2392 adam tegin kásibı oqýǵa jiberilse, bıylǵy jyly bul jumystar jalǵasyn taýyp 2431 adam oqýǵa joldanypty. Memleket tarapynan beriletin qoldaý sharalary bıyl da óz jalǵasyn taýyp, Shymkent qalasy boıynsha 447 adamǵa 400 AEK deıingi mólsherde qaıtarymsyz grant berý josparlanyp otyr.
