شىمكەنت قالاسىنىڭ VIII شاقىرىلعان ءماسليحاتىنىڭ ءبىرىنشى سەسسياسى ءوتتى. جاڭا دەپۋتاتتىق كورپۋسقا 32 دەپۋتات سايلانىپ وتىر. ونىڭ ىشىندە 16 دەپۋتات ءبىر مانداتتى وكرۋگ ارقىلى سايلانعان بولسا، پارتيالىق ءتىزىم بويىنشا «Amاnat» پارتياسىنان – 11 دەپۋتات، «اق جول» پارتياسىنان – 3 دەپۋتات جانە «اۋىل» پارتياسىنان 2 دەپۋتات سايلاندى.
سەسسيادا شىمكەنت قالالىق اۋماقتىق سايلاۋ كوميسسياسىنىڭ توراعاسى قايىربەك قۇنانباەۆ حابارلاما جاساپ، دەپۋتاتتارعا كۋالىكتەرى مەن توسبەلگىلەرىن تابىستادى. جاڭادان سايلانعان دەپۋتاتتاردى قالا اكىمى مۇرات ايتەنوۆ قۇتتىقتاپ، جۇمىستارىنا ساتتىلىك تىلەدى.
كۇن تارتىبىندەگى ءبىرىنشى ماسەلە بويىنشا ءماسليحات توراعاسى لاۋازىمىنا باحادىر نارىمبەتوۆ ۇسىنىلىپ، شەشىم ءبىراۋىزدان قابىلداندى. وسىدان كەيىن شىمكەنت قالالىق ءماسليحاتىنىڭ تۇراقتى كوميسسيالارىن قۇرۋ، ولاردىڭ قۇرامىن بەكىتۋ جانە تۇراقتى كوميسسيالاردىڭ توراعالارىن سايلاۋ تۋرالى شەشىمدەر قابىلداندى.
وسىلايشا، بيۋدجەت جانە ەكونوميكالىق دامۋ جونىندەگى تۇراقتى كوميسسياسى توراعالىعىنا – البينا ەلشيەۆا، الەۋمەتتىك-مادەني دامۋ جونىندەگى تۇراقتى كوميسسيا توراعالىعىنا دارياكۇل قوجامجاروۆا، قۇرىلىس جانە ينفراقۇرىلىمدى دامىتۋ جونىندەگى تۇراقتى كوميسسياسى توراعالىعىنا شىڭعىس قوزباحوۆ، كاسىپكەرلىكتى دامىتۋ جانە تسيفرلاندىرۋ جونىندەگى تۇراقتى كوميسسياسى توراعالىعىنا ايجان نايمبەكوۆا، جەرگىلىكتى ءوزىن-ءوزى باسقارۋ جانە قوعامدىق قاۋىپسىزدىك جونىندەگى تۇراقتى كوميسسياسى توراعالىعىنا مەرلان كەرىمجانوۆ، ينۆەستيتسيا جانە قالالىق جايلى ورتانى دامىتۋ جونىندەگى تۇراقتى كوميسسياسى توراعالىعىنا نويان تولەگەنوۆ سايلاندى.
