"مينيسترلەردىڭ وڭىرلەرگە ساپارىنان حالىق كوبىنەسە حابارسىز قالادى". بۇل پىكىردى بۇگىن ۇكىمەت وتىرىسىندا قر اقپارات جانە قوعامدىق دامۋ ءمينيسترى دارحان قىدىرالى ءمالىم ەتتى، دەپ جازادى "ادىرنا" ۇلتتىق پورتالى inbusiness.kz-كە سىلتەمە جاساپ.
"2022 جىلدىڭ قورىتىندىسى بويىنشا مينيسترلەردىڭ حالىقپەن كەزدەسۋىن تالداۋ جۇمىستارى مىنا ماسەلەلەردى كورسەتتى. مينيسترلەردىڭ وڭىرلەردەگى حالىقپەن كەزدەسۋىندەگى ماڭىزدى شارالار: كەزدەسۋلەردى جاريالاۋ، ماسەلەلەردى الدىن الا جيناقتاۋ، بريفينگتەر، ازاماتتاردى جەكە قابىلداۋ، كوممەرتسيالىق ەمەس ۇيىمدارمەن كەزدەسۋلەر جانە پروبلەمالىق ماسەلەلەر بويىنشا ءىس-قيمىل جوسپارىن دايىنداۋ. كەيبىر ورتالىق اتقارۋشى ورگاندار اتالعان تالاپتاردى تولىق ساقتاماعانى انىقتالىپ وتىر", – دەگەن مينيستر ناقتى ساندارعا توقتالدى.
ونىڭ ايتۋىنشا، 2022 جىلى كوشپەلى كەزدەسۋلەر اياسىندا مينيسترلەر 216 جەكە قابىلداۋ وتكىزىپ، 1498 ازاماتتىڭ ارىز-شاعىمىن تىڭداعان.
"كەزدەسۋدە 1679 پروبلەمالىق ماسەلە كوتەرىلىپ، ونىڭ 1241-ءى نەمەسە 74%-ى شەشىلدى. ال 438-ءى مەملەكەتتىك ورگانداردىڭ ورىنداۋىندا. اتالعان ءىس-شارالاردىڭ وڭ اسەرى مەن ناتيجەلى بولعانىن اتاپ وتكىمىز كەلەدى. ماسەلەن، وقۋ-اعارتۋ ءمينيسترىنىڭ حالىقپەن كەزدەسۋ قورىتىندىسى بويىنشا، مەملەكەتتىك مەكتەپتەردە وقۋشىلاردى تاماقتاندىرۋ قاعيدالارىنا وزگەرىستەر ەنگىزىلدى", – دەدى مينيستر.
سونىمەن قاتار، سولتۇستىك قازاقستان وبلىسىندا ىشكى ىستەر ءمينيسترىنىڭ كەزدەسۋى ناتيجەسىندە جەرگىلىكتى سپورت مەكتەبى "دينامو" دەنە شىنىقتىرۋ-سپورت قوعامىنىڭ قامقورلىعىنا الىندى.
"بۇل رەتتە، ازاماتتار مەن باق مينيسترلەردىڭ وڭىرلەرگە ساپارى جەرگىلىكتى باق-تا كەڭىنەن جاريالانبايتىنىن، حالىقتىڭ كوبىنەسە حابارسىز قالاتىنىن ەسكەرگەن ءجون. كەستەگە سايكەس، 2022 جىلعا 227 كەزدەسۋ جوسپارلانعان، ونىڭ 55-ءى ءبىرىنشى جارتىجىلدىققا، 172-ءسى ەكىنشى جارتىجىلدىققا مەجەلەنگەن. ناتيجەسىندە 2022 جىلى (مامىر-جەلتوقسان كەزەڭىندە) بارلىعى 212 كەزدەسۋلەر وتكىزىلدى. مينيسترلەردىڭ حالىقپەن كەزدەسۋلەرىنە جۇرگىزىلگەن سالىستىرمالى تالداۋ جۇمىستارى ەكىنشى جارتىجىلدىقتا كەزدەسۋ قارقىنى 2,3 ەسە وسكەنىن كورسەتتى", – دەدى اقپارات جانە قوعامدىق دامۋ ءمينيسترى.
"ادىرنا" ۇلتتىق پورتالى
