Áleýmettik jelide Májilis depýtaty Ardaq Nazarovtyń jýrnalısterdiń suraǵyna jaýap bermegeni qyzý talqylanyp jatyr. Keshe Adyrna.kz ulttyq portalynyń tilshisi sý jańa depýtattyń tártibin Májilis tóraǵasy Erlan Qoshanovqa jetizgen bolatyn. Spıkerdiń «Ardaq Nazarovqa eskertý beriledi» degeninen keıin depýtat táýbesine túsken sekildi. Naqtyraq aıtsaq, «ınternetti aqtaryp bas aýyrtpaıtyn» azamat facebook áleýmettik jelisinde jýrnalısterge alǵys bildiripti.
«Allaǵa shúkir, búgin halqymyzdyń aldynda ANT berip jańa jaýapkershilikti óz moınymyzǵa júktedik. Maǵan shyn nıetpen tilekshi bolyp otyrǵan aǵaıynǵa alǵysymdy bildiremin “Biraz suraqtarǵa jaýap berilmedi”-dep ýaıymdap otyrǵandaryńyzdy bilemin. Biz sportshymyz ǵoı, rıngke qyzdyrynbaı kirmeımiz. Dál sol sııaqty saıası rıngte de qyzdyrynyp, jan-jaqty baǵamdap, ishki kýhnıasyn kórip baryp jaýap bergenimiz durys bolady. Jaqsy-jamandy tarazylaıtyn, baǵa beretin ýaqyt áli alda. Aıtpaqshy jýrnalıster qaýymyna alǵysymdy bildiremin, bizdi saıası maıdanǵa kirmesten buryn shyńdap jatyrsyzdar», - dep jazdy depýtat.
Ardaq Nazarovtyń jazbasy Erlan Qoshanovqa qoıylǵan suraqtar keıin jarııalanyp otyr. Demek Májilis tóraǵasy depýtatpen sóılesken bolýy múmkin. Al Adyrna.kz ulttyq portalynyń tilshisi Erlan Jaqanulyna qandaı suraq qoıyp edi?
– Erlan Jaqanuly depýtattar jumysyna kirispeı jatyp «óner» shyǵaryp jatyr. Naqtyraq aıtsam, keshe Ardaq Nazarov Ortalyq saılaý komıssııasynyń aldynda jáne búgin Májiliste jýrnalısterdiń suraǵyna ádeıi jaýap bermeı ketti. Májilistiń janyndaǵy ádep komıssııasynda jýrnalısterdiń suraǵyna jaýap bermeıtin depýtattardyń máselesi qarala ma?
– Biz áli ádep keńesin qurǵan joqpyz. Biraq biz meılinshe ashyq bolýǵa tyrsamyz. Búgin depýtattardyń birinshi jańa otyrysy boldy ǵoı. Árıne, men Parlament spıkeri retinde jáne ózge de basshylar depýtattarmen jumys júrgizip, jýrnalısterge baılanysty talapty jetkizemiz. Buǵan deıingi jetinshi shaqyrylymda ondaı oqıǵalar boldy dep men aıta almaımyn. Solaı ǵoı!? Sondyqtan, biz de ony qaıtalamaýǵa tyrysamyz. Árıne, jýrnalıstermen kezdesý, sizderge suhbat berý – birinshi kezekte bizdiń múddemiz. Sebebi sizder arqyly halyqqa jasap jatqan jumysymyzdy jetkizý – bizge qajet.
– Jeke ózińizdiń tarapyńyzdan Ardaq Nazarovqa eskertý bola ma?
– Ardaq Nazarov bizdiń reglamentti buzatyn bolsa, árıne, eskertý beriledi.
– Jýrnalısterdiń suraǵyna ádeıi jaýap bermeıtin bolsa. zańda qandaı tetik kórsetilgen? Mysaly depýtattyq mandattan aıyrý máselesi qarastyryla ma?
– Jýrnalısterdiń suraǵyna jaýap bermegen eken dep, depýtattyq mandatynan aıyrý degen zańda qarastyrylmaǵan. Depýtat ózi quqyly – jaýap bere me, joq pa? Biraq jaýap berýi qajet.
– Eger jýrnalıstiń suraǵyna jaýap bermese nege depýtat boldy?
– Meniń oıymsha, bul sheshilmeıtin másele emes.
P.S. Jalpy Ardaq Nazarovqa qatysty suraq kóp. Mysaly onyń Bekbolat Tileýhan men Muhamedjan Tazabekovke qandaı qatysy bar? Eger Ardaq Nazarov jýrnalısterdiń suraǵyna ashyq jaýap berse, onda ol synnan qorytyndy shyǵarǵan bolyp sanalady. Al taǵy da eski áýenine bassa, onda mundaı adamnyń depýtat bolǵanynan halyqqa qandaı paıda bar?
Serik JOLDASBAI,
"Adyrna" ulttyq portaly
