شىمكەنتتە حالىقارالىق «ۇلى قازاق ويىندارى» اتتى اۋقىمدى ەتنوفەستيۆال ءوتتى

2515
Adyrna.kz Telegram
شىمكەنتتە قازاقستاننىڭ تۇكپىر-تۇكپىرىنەن قاتىسۋشى رەتىندە، قوناق رەتىندە دە مىڭداعان ادامدى جيناعان «ۇلى قازاق ويىندارى» اۋقىمدى ەتنوفەستيۆالى ءوتتى. 
ءىس-شارا باعدارلاماسى ءار ءتۇرلى بولعانىمەن، باستى نازار ۇلتتىق سپورت تۇرلەرىنە بەرىلدى. ءۇش كۇن ىشىندە شىمكەنتتە كوكپار، قازاقشا كۇرەس، اۋدارىسپاق، ساداق اتۋ، توعىزقۇمالاق، بايگە جانە باسقا دا ۇلتتىق سپورت تۇرلەرى بويىنشا جارىستار ءوتتى. تاعى ءبىر ماڭىزدى دەتال: بارلىق سايىستاردا جانكۇيەرلەر كوپ بولدى جانە وتە بەلسەندى قولداۋ كورسەتتى. سونىمەن قاتار، كورەرمەندەر جەرگىلىكتى سپورتشىلاردى دا، باسقا وڭىرلەردەن كەلگەن قوناقتاردى دا جىلى قارسى الدى.
ايتپاقشى، جارىسقا قازاقستاندىقتار عانا قاتىسقان جوق. قىرعىزستان، وزبەكستان، موڭعوليا جانە قىتايدان كەلگەن سپورتشىلار دا جۇلدە ءۇشىن تالاسقا ءتۇستى. بارلىعى 1000-نان استام سپورتشى قاتىستى.
كوكپاردان ءتۋرنيردىڭ فينالى جامبىل وبلىسىنىڭ قۇراماسى مەن قىرعىزستان كومانداسى اراسىندا ءوتتى. ءبىزدىڭ سپورتشىلار ماتچتا جەڭىسكە جەتتى. سونداي-اق، اۋدارىسپاقتاعى سوڭعى جەكپە-جەكتەر مەن تەڭگە ءىلۋ جارىسىن كوردىم.
فەستيۆالدىڭ باستى وقيعاسى 18 شاقىرىمدىق الامان بايگە بولدى. جارىسقا ەلىمىزدىڭ بارلىق وڭىرىنەن جينالعان 30-عا جۋىق جۇيرىك پەن شاباندوز قاتىستى. باس بايگەنى شىمكەنتتىڭ 12 جاستاعى شابوندوزى جەڭىپ الدى. مەن ماراپاتتاۋ راسىمىنە قاتىسىپ، چەمپيوندى قۇتتىقتادىم.
جارىس بوزارىق اۋدانىنداعى جاڭا يپپودرومدا ۇيىمداستىرىلدى، يپپودرومنىڭ اشىلۋى «ۇلى قازاق ويىندارى» باستالعانعا دەيىن ءوتتى. ايتا كەتۋ كەرەك، نىسان وزىنە جۇكتەلگەن تاپسىرمانى وتە جاقسى ورىنداپ، ءىرى حالىقارالىق جارىستاردى قابىلداۋعا دايىن ەكەنىن دالەلدەدى. بۇل ءبىز ءۇشىن وتە ماڭىزدى، سەبەبى مەملەكەت باسشىسى 2024 جىلى ەلىمىزدە وتەتىن V دۇنيەجۇزىلىك كوشپەندىلەر ويىندارىن جوعارى دەڭگەيدە ۇيىمداستىرۋدى تاپسىرعان بولاتىن.
"ادىرنا" ۇلتتىق پورتالى
پىكىرلەر