شىمكەنت ءاردايىم ءدامدى تاعامى جانە قوناقجايلىلىعىمەن ەرەكشە. قازىر ءال-فارابي الاڭىندا ناۋرىز مەرەكەسى اياسىندا بارماعىنان بال تامعان اسپازدار سىنعا ءتۇسىپ جاتىر. بۇل سايىس شىمكەنت قالاسىنىڭ تۋريزم، سىرتقى بايلانىستار جانە كرەاتيۆتى يندۋستريا باسقارماسىنىڭ ۇيىمداستىرۋىمەن ء"دامداسTour" فەستيۆالى اياسىندا ءوتىپ جاتىر.
فەستۆالدى شىمكەنت قالاسى اكىمىنىڭ ءبىرىنشى ورىنباسارى قۋانىش اسىلوۆ اشىپ، قالا تۇرعىندارىن ناۋرىز مەيرامىمەن قۇتتىقتادى.
— ءدامداسTour" فەستيۆالىنىڭ ناۋرىز مەرەكەسىندە ۇيىمداستىرىلۋىنىڭ ءوز ءمان-ماعىناسى بار. بۇل بەرەكە مەن بىرلىكتىڭ، تاتۋلىقتىڭ، مولشىلىق پەن كەڭدىكتىڭ ۇلگىسى بولاتىنىنا سەنىمدىمىز، - دەدى قۋانىش جۇمابەكۇلى.
مۇندا قالامىزدىڭ تانىمال 50-گە جۋىق تاماقتانۋ ورىندارى — مەيرامحانا، كوفەينيا، سامساحانالار، فاست-فۋد، بالمۇزداق، شايحانالار قاتىسىپ، وزدەرىنىڭ اۆتورلىق مازىرلەرىن ۇسىنۋدا. جارمەڭكەنىڭ باستى ماقساتى – شىمكەنت قالاسىن ەلىمىزدىڭ گاسترونوميالىق ورتالىعى رەتىندە ءيميدجىن قالىپتاستىرۋ.
— " ءدامداسTour II" فەستيۆالىن – ءۇشىنشى مەگاپوليستىڭ جىل سايىنعى ءدامدى مەرەكەسىنە اينالدىرۋ ويىمىزدا بار. بۇل قالامىزدىڭ ءتۋريزمىن دامىتۋعا وڭ سەپتىگىن تيگىزەدى جانە بۇل قالا كاسىپكەرلەرىن قولداۋ، - دەيدى "Visit Shymkent"تۋريستىك اقپاراتتىق ورتالىعىنىڭ باسشىسى ەرلان وماروۆ.
ايتا كەتەيىك، ءىس-شارا ەكى كۇن وتەدى. ەكى كۇن بويى «ناۋرىزكوجە«،«كاۋاپ»،«پالاۋ» جانە «سامسا» نوميناتسيالارى بويىنشا 50-گە جۋىق تاماقتانۋ ورىندارى اراسىنان ۇزدىكتەردىڭ ىشىنەن ناعىز ۇزدىكتەر انىقتالاتىن بولادى. جەڭىمپازدار ارنايى باعالى سىيلىقتارمەن ماراپاتتالادى. سونداي-اق، كەلگەن قوناقتارعا قالامىزدا داستۇرگە اينالعان «شىمكەنت ءشايى» تاراتىلادى. جارمەڭكە اياسىندا كونتسەرتتىك باعدارلامالار، ويىن-ساۋىق جانە ءتۇرلى كونكۋرستار ويناتىلىپ، جەڭىمپازدارعا سەرتيفيكاتتار ۇسىنىلادى.
