بۇگىن شىمكەنت قالاسىندا جاڭادان اشىلعان يپپودرومدا «ناۋرىز شىمكەنتتەن باستالادى» اتتى مەرەكەلىك شارا ءوتتى.
ۇلىستىڭ ۇلى كۇنىنە ارنالعان مەرەكەلىك باعدارلاما ءار ءوڭىردىڭ سالت-ءداستۇرىن ناسيحاتتايتىن باتىس پەن شىعىستىڭ، سولتۇستىك پەن وڭتۇستىكتىڭ كەرۋەنىن كۇتىپ الۋدان باستالدى. بۇل كەرۋەندەردىڭ قۇرامىندا ءار ءوڭىردىڭ بەلگىلى ونەرپازدارى مەن سپورتشىلارى بار. باتىس كەرۋەنىن ەلىمىزگە بىلگىلى ءانشى تامارا اسار، شىعىس كەرۋەنىن ءداستۇرلى ءانشى ارداق بالاجانوۆا، سولتۇستىك كەرۋەنىن تانىمال ەسترادا ءانشىسى مادينا سادۋاقاسوۆا، وڭتۇستىكتىڭ كەرۋەنىن جەرگىلىكتى ءداستۇرلى ءانشى ناركەنجە سەرىكباەۆا باستاپ شىقتى.
مۇنان كەيىن ات قۇلاعىندا وينايتىن سپورتشىلار بايگە، قىز قۋ مەن تەڭگە ءىلۋ سەكىلدى ۇلتتىق سپورت تۇرلەرىمىزدى كورەرمەنگە پاش ەتىپ، جۇرتشىلىققا مەرەكەلىك كوڭىل-كۇي سىيلادى.
شىمكەنت قالاسىنىڭ اكىمى مۇرات ايتەنوۆ مەرەكەگە جينالعان ۇلىستىڭ ۇلى كۇنى ءاز-ناۋرىز مەيرامىمەن قۇتتىقتادى.
– ناۋرىز — بارلىق تىرشىلىك اتاۋلى جاندانىپ، تابيعاتتىڭ قايتا تۇلەيتىن كەزى. بۇل ىزگىلىك پەن مەيىرىمدىلىكتىڭ، ىنتىماق پەن بىرلىكتىڭ، بەيبىتشىلىك پەن مولشىلىقتىڭ مەيرامى. بۇگىن وسىناۋ ناۋرىز مەيرامىنىڭ قارساڭىندا ۇلتتىق سپورتتىڭ دامۋىنا اسەر ەتەتىن ۇلكەن، جاڭا، زاماناۋي يپپودرومنىڭ اشىلۋىنا كۋا بولىپ وتىرمىز. بۇل شىمكەنت قالاسىنىڭ جىلدان جىلعا كوركەيىپ، دامىپ كەلە جاتقانىنىڭ تاعى ءبىر كورسەتكىشى، - دەدى م.ايتەنوۆ.
مەرەكەلىك باعدارلاما «قاراجورعا» بيىمەن قورىتىندىلانادى. ناۋرىز تويىنا جينالعان كوپشىلىك ونەرپازدارمەن بىرگە بي بيلەپ، شاتتانىپ جاتتى.
ۇلىستىڭ ۇلى كۇنى ناۋرىزعا ارنالعان "GREAT QAZAQ GAMES" ءىس-شاراسىمەن جالعاسۋدا. وندا ەلىمىزدىڭ بارلىق وڭىرلەرىنەن جانە تۇركيا، قىتاي، موڭعوليا، وزبەكستان، قىرعىزستان، تاجىكستان، رەسەي، ساۋد ارابياسى مەن يوردانيادان كەلگەن سپورتشىلار باق سىناۋدا. ولار 3 كۇن بويىنا كوكپار، بايگە، قىز قۋ، تەڭگە ءىلۋ، اۋدارىسپاق، قازاق كۇرەسى، ءداستۇرلى ساداق اتۋ، توعىزقۇمالاق جانە وزگە دە ۇلتتىق سپورت تۇرلەرى بويىنشا باق سىنايدى.
