Búgin Shymkent qalasynda jańadan ashylǵan ıppodromda «Naýryz Shymkentten bastalady» atty merekelik shara ótti.
Ulystyń uly kúnine arnalǵan merekelik baǵdarlama ár óńirdiń salt-dástúrin nasıhattaıtyn Batys pen Shyǵystyń, Soltústik pen Ońtústiktiń kerýenin kútip alýdan bastaldy. Bul kerýenderdiń quramynda ár óńirdiń belgili ónerpazdary men sportshylary bar. Batys kerýenin elimizge bilgili ánshi Tamara Asar, Shyǵys kerýenin dástúrli ánshi Ardaq Balajanova, Soltústik kerýenin tanymal estrada ánshisi Madına Sadýaqasova, Ońtústiktiń kerýenin jergilikti dástúrli ánshi Narkenje Serikbaeva bastap shyqty.
Munan keıin at qulaǵynda oınaıtyn sportshylar báıge, qyz qýý men teńge ilý sekildi ulttyq sport túrlerimizdi kórermenge pash etip, jurtshylyqqa merekelik kóńil-kúı syılady.
Shymkent qalasynyń ákimi Murat Áıtenov merekege jınalǵan Ulystyń uly kúni Áz-Naýryz meıramymen quttyqtady.
– Naýryz — barlyq tirshilik ataýly jandanyp, tabıǵattyń qaıta túleıtin kezi. Bul izgilik pen meıirimdiliktiń, yntymaq pen birliktiń, beıbitshilik pen molshylyqtyń meıramy. Búgin osynaý Naýryz meıramynyń qarsańynda ulttyq sporttyń damýyna áser etetin úlken, jańa, zamanaýı ıppodromnyń ashylýyna kýá bolyp otyrmyz. Bul Shymkent qalasynyń jyldan jylǵa kórkeıip, damyp kele jatqanynyń taǵy bir kórsetkishi, - dedi M.Áıtenov.
Merekelik baǵdarlama «Qarajorǵa» bıimen qorytyndylanady. Naýryz toıyna jınalǵan kópshilik ónerpazdarmen birge bı bılep, shattanyp jatty.
Ulystyń Uly kúni Naýryzǵa arnalǵan "GREAT QAZAQ GAMES" is-sharasymen jalǵasýda. Onda elimizdiń barlyq óńirlerinen jáne Túrkııa, Qytaı, Mońǵolııa, Ózbekstan, Qyrǵyzstan, Tájikstan, Reseı, Saýd Arabııasy men Iordanııadan kelgen sportshylar baq synaýda. Olar 3 kún boıyna kókpar, báıge, qyz qýý, teńge ilý, aýdaryspaq, qazaq kúresi, dástúrli sadaq atý, toǵyzqumalaq jáne ózge de ulttyq sport túrleri boıynsha baq synaıdy.
