نۇرشۋاق شاعىناۋدانى تۇرعىندارى ناۋرىز مەرەكەسىن تويلاۋدى باستاپ كەتتى. سايلاۋدا داۋىس بەرىپ، ءوز تاڭداۋىن جاساپ شىققان نۇرشۋاقتىقتار «ارمىسىڭ، ءاز ناۋرىز!» اتتى مەرەلىك ءىس-شاراعا بەلسەندى تۇردە قاتىستى.
تۇرعىندار داستارحانعا قويىلعان ناۋرىزكوجەدەن ءدام تاتىپ، بالالار التاباقان تەپتى. تويعا كەلگەن جۇرتشىلىق ارقان تارتىسىپ، قول كۇرەسىنەن سىنعا ءتۇستى. ونەرپازداردىڭ كونتسەرتتىك باعدارلاماسى تويدىڭ كوركىن قىزدىردى.
– تاڭ ازانىمەن تۇرىپ، ۋچاسكەلىك سايلاۋعا باردىق. سايلاۋ – ماڭىزدى شارا. ءبىزدىڭ ارقايسىمىزدىڭ داۋسىمىز ەلىمىزدىڭ ەرتەڭىن جارقىن بولاشاققا باستايدى. ال جاڭا پارتيا، جاڭا كانديداتتاردان حالىقتىڭ ءۇمىتى كوپ. ەلىمىزدىڭ وركەندەۋىنە ۇلەس قوساتىن ازاماتتار سايلانىپ، وتانىمىزدىڭ ابىرويى اسقاقتاي بەرسىن.
شاعىناۋدان تۇرعىندارى مەرەكەنىڭ وتۋىنە دە ەرەكشە اتسالىسىپ وتىر. ءبارى ءبىراۋىزدان ناۋقانعا قاتىستى، - دەيدى اۋىل بەلسەندىسى زيباگۇل قوسۋاق.
