شىمكەنتتەگى قازىعۇرت شاعىناۋدانىنداعى №86 جالپى ءبىلىم بەرەتىن مەكتەپ عيماراتىنداعى №71 سايلاۋ ۋچاسكەسىندە داۋىس بەرۋشىلەر ناۋرىز كوجەدەن ءدام تاتتى. مەرەكەلىك داستارحاننان ءدام تاتقان تۇرعىندار سايلاۋ ناۋقانىنداعى بۇل باستاماعا ريزاشىلىعىن ءبىلدىردى.
–بۇل جولعى سايلاۋ ناۋقانى ناۋرىز مەرەكەسىنە تۇسپا-تۇس كەلىپ وتىر. مىنە، وسىنداي قۋانىشتى، مەرەكەلى كۇندە ءوزىمىز سەنىم ارتقان ۇمىتكەرلەرگە داۋىس بەردىك. ۇيىمداستىرۋشىلارعا كوپ راقمەت. ەسىكتەن كىرگەن بويدا جىلى لەبىزىمەن قارسى الىپ، ناۋرىز كوجە مەن باۋىرساق ۇلەستىرىپ، جاقسى كوڭىل-كۇي سىيلاپ جاتىر. وسى ءساتتى پايدالانىپ، بارشا شىمكەنتتىكتەردى ۇلىستىڭ ۇلى كۇنىمەن شىن جۇرەكتەن قۇتتىقتايمىن. بۇگىنگى سايلاۋعا بەلسەندى تۇردە قاتىسۋعا شاقىرامىن،-دەدى تۇران اۋدانىنىڭ ءبيى جەتپىسباي جۇرىمباەۆ.
قالاداعى №71 سايلاۋ ۋچاسكەسىندە تاڭ ازاننان بەرى داۋىس بەرۋشىلەر بەلسەندى قاتىسىپ جاتىر. بۇل سايلاۋ ۋچاسكەسىندە 2 125 تۇرعىن تىركەلگەن. ال ءجۇرىپ-تۇرۋى قيىن جاندارعا كوميسسيا مۇشەلەرى وزدەرى بارادى. ولار ءۇشىن بارلىق جاعداي جاسالعان. قازىرگە دەيىن 3 سايلاۋشىدان ۇيدە داۋىس بەرۋ ۇسىنىسى تۇسكەن.
