2023 جىلى ناۋرىز ايىنىڭ 16 جۇلدىزىندا الماتى وبلىسىنىڭ مادەنيەت، ارحيۆتەر جانە قۇجاتتاما باسقارماسىنا قاراستى «الماتى وبلىسىنىڭ مۋزەيلەر بىرلەستىگى» مكقك-ءنىڭ فيليالى «اناعا قۇرمەت» مۋزەيىندە ۇلىستىڭ ۇلى كۇنى – ناۋرىز مەرەكەسىنە ارنالعان «ناۋرىز – جاڭعىرعان سالت-داستۇرلەر»اتتى مەرەكەلىك مادەني-تانىمدىق ءىس-شارا ءوتتى.
ءىس-شارادا مەرەكەلىك كونتسەرت قويىلىپ، قىدىر اتا، ۇماي انا، ابىلاي حان، بۇقار جىراۋ جانە تولە بي، قىزىبەك بي، ايتەكە بي سىندى بيلەردىڭ وبرازدارىنان قۇرالعان ساحنالىق قويىلىمدار ۇسىنىلدى. سونىمەن قاتار ،قولونەر شەبەرلەرى بۇيىمدارىنىڭ كورمەسى كورسەتىلدى. مەرەكەلىك شارا ۇلتتىق، سپورتتىق-بۇقارالىق ويىندارمەن جالعاسىپ، سپورتشىلار ونەرلەرىن كورسەتتى.
الماتى وبلىسى مۋزەيلەر بىرلەستىگىڭ باسشىسى انۋار ۇمبەتاليەۆ اۋدان تۇرعىندارى مەن قوناقتارىن قۇتتىقتاپ، ءسوز سويلەدى.
- «ناۋرىز – جىل باسى عانا ەمەس، بۇل ەڭ الدىمەن ىزگىلىك پەن جاقسىلىقتىڭ مەيرامى. ناۋرىز – رۋحاني تازارۋ مەن ۇيلەسىمنىڭ، بەيبىتشىلىك پەن بەرەكەنىڭ سيمۆولى. يگى ءداستۇر بويىنشا ءبىز دە جاڭا جىلدان جاقسىلىقتار مەن جاڭا جەتىستىكتەر كۇتەمىز. ەلىمىزدىڭ مەرەيىن ءوسىرىپ، بار بولمىسىمىزدى ايشىقتايتىن قاسيەتتى ناۋرىز مەرەكەسى ءاربىر وتباسىنا بىرلىك پەن قۋانىش، قۇت-بەرەكە، باقىت پەن مولشىلىق اكەلسىن! ەلىمىزدەگى تۇراقتىلىق تۇعىرى بەكەمدەلىپ، باق-بەرەكەمىز ارتا بەرسىن! ۇلىس وڭ بولسىن، اق مول بولسىن، اعايىن!»
ناۋرىز مەيرامىنا وراي «اناعا قۇرمەت» مۋزەيىنىڭ الاڭىنا كيىز ءۇي، ەكى شاتىر تىگىلىپ، مەرەكەنى تاماشالاۋعا كەلگەن حالىق ناۋرىز كوجە، باۋىرساق، قىمىز جانە باسقا دا قازاقتىڭ ۇلتتىق تاعامدارىنان ءدام تاتتى. كۇن مەن ءتۇننىڭ تەڭەلىپ، جان-دۇنيەنى تىرىلتكەن، شارۋانىڭ ءبىر مالى ەكەۋ بولىپ، ارقا-باسى كەڭىپ، اققا اۋزى تيگەن، قىتىمىر قىستىڭ ىزعارىنان قۇتىلىپ، الداعى شۋاقتى كۇندەردەن ۇمىتتەندىرگەن ناۋرىز مەرەكەسى تاۋەلسىز ەلىمىزدىڭ زور ىقىلاسپەن تويلاناتىن ناعىز حالىقتىق سيپاتتاعى سالتاناتىنا اينالدى.
