11 ناۋرىزدا پارلامەنت ءماجىلىسى دەپۋتاتتىعىنا ماجوريتارلىق جۇيە بويىنشا كانديدات كالەنوۆا اكسانا مەن ءماسليحات دەپۋتاتتىعىنا ۇمىتكەر انجەلا گورنوستاەۆا وسكەمەندەگى «جان انا» قوعامدىق قورىنىڭ مۇشەلەرىمەن كەزدەستى.
وندا سپيكەرلەر كوپبالالى انالارعا حالىق پارتياسىنىڭ سايلاۋالدى باعدارلاماسىن تانىستىردى.
قازىر ەلىمىزدەگى بارلىق ايماقتىڭ حالقىن تولعاندىرعان الەۋمەتتىك سالادا ماسەلەلەر كوپ. اتاپ ايتار بولساق، تۇرعىندار تۇرعىن ۇيگە قول جەتكىزە الماي كەلەدى. مەديتسينا مەن زەينەتاقى سالاسى دا سىن كوتەرمەيدى.
– حالىق پارتياسى 1-3 بالا تاربيەلەپ وتىرعان انالار ءۇشىن – قولجەتىمدى باسپانا، ال كوپبالالى انالارعا – تەگىن باسپانامەن قامتۋدى تالاپ ەتەدى، – دەدى اكسانا كالەنوۆا.
حالىق پارتياسى بالالارعا لايىقتى جاردەماقى بەرىلۋ كەرەك دەگەن پىكىردە. وسى ورايدا پارتيا 1 بالاعا ەڭ تومەنگى جالاقى ياعني، 70 مىڭ تەڭگە مولشەرىندە جاردەماقى تاعايىنداۋدى تالاپ ەتەدى. مىسالى، 4 بالاعا بەرىلەتىن جاردەماقى 280 مىڭ تەڭگەنى قۇرايدى.
وسى رەتتە ءسوز العان پارتيا وكىلى انجەلا گورنوستاەۆا الەۋمەتتىك رەفورومالاردى جۇزەگە اسىرۋ ءۇشىن ەڭ الدىمەن ساياسي وزگەرىستەر كەرەك ەكەنىن تىلگە تيەك ەتتى.
– ءبىزدىڭ پارتيا ەڭ ءبىرىنشى كەزەكتە قاراپايىم حالىقتىڭ تىلەگىن تۇسىنەتىن حالىقتىق ۇكىمەت قۇرۋ قاجەت دەپ ەسەپتەيدى. ءبىزدىڭ ماقساتىمىز – حالىقتىڭ بيلىگى مەن بايلىعى قازاقستاندىقتارعا تيەسىلى ادىلەتتى قوعام قۇرۋ، – دەدى ول.
كەزدەسۋ بارىسىندا كوپبالالى انالار وزدەرىن تولعاندىرعان وزگە دە ساۋالداردى جولداپ، تۇشىمدى جاۋاپتار الدى.
"ادىرنا" ۇلتتىق پورتالى
