بىرىككەن ۇلتتار ۇيىمى تۇركيا مەن سيريادا بولعان جويقىن جەر سىلكىنىسىن سارالاپ، قازىرگى كۇننىڭ وزىندە 850 مىڭ بالانىڭ ءۇي-كۇيسىز قالعانىن ايتتى. پالەكەتتىڭ "ادامزات تاعدىرىن شارپىعانىنا" ءبىر اي وتكە دە، باسپاناسىز قالعان بالالاردىڭ بارار جەر، باسار تاۋى جوق. ولار ءالى كۇنگە دەيىن ادامياتتىق كومەككە ءزارۋ، دەپ حابارلايدى "ادىرنا" ۇلتتىق پورتالى.
يۋنيسەف بالالار قورىنىڭ مالىمەتىنشە، جەر سىلكىنىسىنىڭ اۋىر قامىتى موينىنا تۇسكەن قوس ەلدە ەكى مىڭعا جۋىق بالا ۋاقىتشا باسپانالاردا تۇرۋعا ءماجبۇر قالعان. تۇركيا مەن سيريادا 6 اقپاندا بولعان كۇشتى جەر سىلكىنىسى سالدارىنان قازا تاپقاندار مەن زارداپ شەككەندەردىڭ ناقتى سانى ءالى بەلگىسىز.
يۋنيسەف ساراپشىلارى دابىل قاقتى. ولاردىڭ ايتۋىنشا، ءالى مىڭداعان بالا قيىن جاعدايدا كۇنەلتىپ جاتىر. ولار كومەككە، سونىڭ ىشىندە پسيحولوگيالىق كومەككە قاتتى ءزارۋ.
"جەر سىلكىنىسى سالدارىنان ءۇيىن تاستاپ كەتۋگە ءماجبۇر بولعان وتباسىلار ءتورت اپتا بويى امان قالۋعا تىرىسىپ كەلدى. ولار ءدۇمپۋ جالعاسىپ جاتقاندىقتان، زارەسى ۇشىپ وتىردى دەۋگە بولادى", - دەدى يۋنيسەف ەۋروپا جانە ورتالىق ازيا بويىنشا ايماقتىق ديرەكتورى افشان حان.
تۇركياداعى 2,5 ميلليون بالاعا شۇعىل گۋمانيتارلىق كومەك قاجەت. سيريالىق 500 مىڭ ادام ءوز باسپاناسىن تاستاپ كەتۋگە ءماجبۇر بولعان. اپاتتى جاعدايتىڭ زارداپتارىمەن كۇرەسۋ، ۇيىمنىڭ حابارلاۋىنشا، كوڭىل كونشىتپەي وتىر.
https://twitter.com/UN/status/1632856694727364612?ref_src=twsrc%5Etfw%7Ctwcamp%5Etweetembed%7Ctwterm%5E1632856694727364612%7Ctwgr%5E31507e8abd1de19788e5115ebeb0424d453dfd72%7Ctwcon%5Es1_&ref_url=https%3A%2F%2Fkaz.zakon.kz%2F6021712-b-trkiya-men-siriyaday-zher-slkns-saldarynan-850-my-bala-baspanasyz-aldy.html
بۇۇ ەسەبىنە سايكەس، تۇركيا مەن سيريادا جەر سىلكىنىسىنەن قازا تاپقاندار سانى 50 مىڭنان استى. سونىمەن قاتار، ءزىلزالا 7 ميلليوننان استام بالانىڭ "بالالىق شاعىن" ويرانداپ، كوڭىلدەرىنە كولەڭكە ءتۇسىردى.
"ادىرنا" ۇلتتىق پورتالى
