بولگاريانىڭ ەڭ ءىرى جوعارى وقۋ ورنىندا قازاق ءتىلى وقىتىلادى. بۇل تۋرالى قر سىرتقى ىستەر مينيسترلىگىنىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
"جوعارى ءبىلىم سالاسىنداعى ىنتىماقتاستىقتى ودان ءارى ىلگەرىلەتۋ ماقساتىندا قازاقستاننىڭ بولگارياداعى ەلشىسى ۆيكتور تەمىرباەۆ اۋليە كلەمەنت وحريدسكي اتىنداعى سوفيا ۋنيۆەرسيتەتىنىڭ رەكتورى اناستاس گەردجيكوۆپەن كەزدەستى. 2018 جىلدىڭ قازان ايىندا ءال-فارابي اتىنداعى قازۇۋ-مەن ارىپتەستىك كەلىسىم نەگىزىندە قۇرىلعان ءال-فارابي عىلىمي-ءبىلىم بەرۋ جانە مادەني ورتالىعىنىڭ قابىرعاسىندا قازاق ءتىلىن وقىتۋ تاجىريبەسىن ودان ءارى ىلگەرىلەتۋگە اڭگىمەلەسۋشىلەردىڭ ەرەكشە نازارى اۋدارىلدى",- دەلىنگەن حابارلامادا.
سونىمەن قاتار، قازاقستاندىق ديپلومات ۋنيۆەرسيتەت باسشىلىعىنا جان-جاقتى قولداۋ كورسەتكەنى ءۇشىن العىسىن ءبىلدىرىپ، بولگار ستۋدەنتتەرى اراسىندا قازاق ءتىلىن ۇيرەنۋگە دەگەن قىزىعۋشىلىقتىڭ ارتىپ كەلە جاتقانىنا جانە وسى ءپاندى «تۇركولوگيا» فاكۋلتەتىنىڭ وقۋ جوسپارىنا ەنگىزگەنىنە ريزاشىلىعىن ءبىلدىردى.
"ادىرنا" ۇلتتىق پورتالى
