ۇرپاقتى وتباسىلىق، ۇلتتىق قۇندىلىقتار نەگىزىندە تاربيەلەۋ بۇگىنگى كۇننىڭ وزەكتى ماسەلەسىنە اينالىپ وتىر. ويتكەنى قازاق قوعامىنىڭ دىڭگەگى وسى قۇندىلىقتاردا جاتىر. ال وتباسى تاربيەسىندە ۇلتتىق قۇندىلىقتارعا قانىق بولىپ وسكەن بالانىڭ ۇستامى مىقتى بولادى. وتباسىلىق قۇندىلىقتاردى مەڭگەرگەن بالا وسە كەلە ۇلتتىق قۇندىلىقتاردى دا بابىندا يگەرەدى. وتاننىڭ ۇلى ۇعىم ەكەنىن ءتۇسىنىپ، ەلىنىڭ قورعانىنا اينالادى. ۇلت مۇددەسىن، ءوز مۇددەسىنەن بيىك قويادى. مىنە، «ەل بولامىن دەسەڭ، بەسىگىڭدى تۇزە» دەگەن ءسوز وسىدان قالعان.
الايدا سوڭعى جىلدارى وتباسىلىق تاربيەدە جىبەرىلگەن ولقىلىقتار اۋقىمدى تۇس الۋدا. ءتىپتى بۇل ماسەلەلەرگە ۇلت بولىپ ويلاناتىن حالگە جەتتىك. ولار – ءوز ەلىنىڭ تاريحىن بىلمەۋ، انا تىلىنەن الىستاۋ، مادەنيەتىنىڭ ءمانىن تۇسىنبەۋ، سالت-ءداستۇردىڭ ساقتالماۋى، اجىراسۋدىڭ ارتۋى جانە ت.ب. بۇل ولقىلىقتاردىڭ ورنىن تولتىرۋ وڭاي بولماسى انىق. بىراق شەشىمى بار. ول وتباسىداعى تاربيە جۇيەسىن تۇزەۋ. ۇرپاقتى ۇلتتىق ەرەكشەلىكتەر نەگىزىندە تاربيەلەۋ.
قاي قوعامدا ءومىر سۇرمەڭىز زاڭدىلىق وسى. سەبەبى بولاشاق بۇگىننەن باستالادى. نە ەكسەڭىز، سونى وراسىز. جالپى ۇلت دەگەن ۇستىننىڭ مىقتى بولۋى وتباسىداعى ۇرپاق تاريبەسىنە بايلانىستى بولىپ وتىر. ال تاربيە ءبىر كۇندىك ارەكەت ەمەس. از-ازدان ۇزدىكسىز جالعاساتىن ارەكەت. مۇنى اتا-اجەلەرىمىز ەجەلدەن-اق بىلگەن. راسىندا، ءبىزدىڭ بۇگىنگى ۇرپاققا بەرىپ جاتقان تاربيەمىزدىڭ ءبىر بولىگى اتالارىمىزدان وتكەن دەۋگە بولادى. وكىنىشكە وراي، قالالىق ءۇردىس دامىعان سايىن بۇل ۇلتتىق كودىمىزدان الشاقتاپ بارامىز. بار ماسەلەمىز ءۇي مەن جۇمىس اراسىندا. اتالارىمىزدان جەتكەن تاربيە ارتتا قالۋدا. ماسەلەن، باتىس فيلمدەرىن كورىپ وتىرساڭىز ونداعى كەيىپكەر ءوزىنىڭ كىم ەكەنىن، اكەسىنىڭ كىم بولعانىن، اتاسىنىڭ ءتىپتى باباسىنىڭ كىم بولعانىنا شەيىن ايتىپ وتىرادى. ءوزىنىڭ كاسىبى نەمەسە ۇستانىمى سول باباسىنان قالعانىن تىلگە تيەك ەتەدى. ەندى ويلانىپ قاراڭىز، مۇندا اۆتور شەبەر دەرسىز. دەمەك اۆتوردىڭ بويىندا بابادان سىڭگەن قاسيەت، ۇرپاقتار ساباقتاستىعى بار. ءتورت عاسىر بۇرىن بەرىلگەن تاربيەنىڭ تامىرى جاتىر. مىنە، كوردىڭىز بە؟ ءسىزدىڭ دە بويىڭىزدا ءتورت نە بەس عاسىر بۇرىنعى تاربيە جاتىر. سوندىقتان «ۇرپاق تاريبەسى – ۇلى ءىس» دەگەن ءسوز بەكەر ايتىلماعان.
توقسان اۋىز ءسوزدىڭ توبىقتاي ءتۇيىنى ءبىزدىڭ قوعام الدىنداعى پارىزىمىز – ۇلتتىق بولمىسىن جوعالتپاعان، رۋحى اسقاق، ادامي قۇندىلىقتاردى ءاردايىم ارتىق كورەتىن، ۇلتجاندى ۇرپاق تاربيەلەۋ. جالاڭدىقتان ساق بولۋ. كەلەشەككە كەمەلدى مۇرا قالدىرۋ. سانا-سەزىمى ويانعان تۇلعا قالىپتاستىرۋ.
