فوتو: Getty Images
رەسەيدىڭ ۋكرايناعا قارسى سوعىس باستاعانىنا ءتورت جىل تولعاندا، ەل ىشىندە ءتۇرلى الەۋمەتتىك جانە ساياسي ماسەلەلەرگە بايلانىستى قارسىلىق اكتسيالارىنىڭ جيىلەگەنى بايقالادى. بۇل تۋرالى 16 قاراشادا ميحايل حودوركوۆسكيگە جاقىن «موجەم وبياسنيت» Telegram ارناسى حابارلادى، دەپ جازادى «ادىرنا».
اۆتورلار مىسال رەتىندە مۋزىكانتتاردىڭ «شەتەل اگەنتتەرى» دەپ تانىلعان ورىنداۋشىلاردىڭ اندەرىن كوشەدە ورىنداۋىن كەلتىرەدى. بۇل ارەكەت «ستوپتايم» توبىنا قولداۋ كورسەتۋ دەپ باعالانىپ وتىر.
توپ مۇشەلەرى – ۆوكاليست ديانا لوگينوۆا (ناوكو), ونىڭ قالىڭدىعى، گيتاريست الەكساندر ورەحوۆ جانە پەركۋسسيونيست ۆلاديسلاۆ لەونتەۆ – «كارۋسەلدىك قاماۋ» دەپ اتالاتىن جاعدايعا تۇسكەن. بۇل – قىلمىستىق ءىس قوزعاماي-اق، قاماۋ مەرزىمىنىڭ قايتا-قايتا ۇزارتىلۋى.
Telegram ارناسى رەسەيدىڭ ءار وڭىرىندەگى بىرنەشە مىسالدى كەلتىرەدى:
-
ۆلاديۆوستوك، نوۆوسيبيرسك جانە كامچاتكادا ۋتيلالىمدى كوتەرۋگە قارسى شىعۋ;
-
ۆورونەج، ومبى، نوۆوسيبيرسك جانە پەتروپاۆلوۆسك-كامچاتسكىدەگى مەملەكەتتىك Max مەسسەندجەرىنە قارسى ميتينگىلەر;
-
پريمورسك گرەس قۇرىلىسىن جۇرگىزىپ جاتقان مەردىگەر كومپانيا جۇمىسشىلارىنىڭ جالاقىنىڭ كەشىگۋىنە قارسى نارازىلىعى;
-
كۋرسك وبلىسى تۇرعىندارىنىڭ اسكەري قيمىلداردان قيراعان ۇيلەرىنە وتەماقى تالاپ ەتۋى;
-
اقپاندا پەرم قالاسىندا تىركەلمەگەن «راسسۆەت» پارتياسىنىڭ مۇشەسى ەكاتەرينا دۋنتسوۆا ۇيىمداستىرعان انتيۆوەننىي پيكەت.
ارنا مالىمەتىنە قاراعاندا، سوڭعى ۋاقىتتا رەسەيلىكتەر بيلىك ساياساتىنا قارسىلىقتى باسقا جولمەن دە بىلدىرە باستادى: «شەتەل اگەنتى» نەمەسە «تەرروريست» دەپ تانىلعان جازۋشىلاردىڭ شىعارمالارىن وقۋ كوبەيگەن.
مۇنداي كىتاپتار شەتەلدە باسىلىپ، رەسەيگە «بيلىكتىڭ باقىلاۋىنان تىس جولدارمەن» جەتكىزىلەدى.
ساراپشىلاردىڭ پىكىرىنشە، قارسىلىق اكتسيالارىنىڭ جيىلەۋى رەسەي قوعامىنداعى الەۋمەتتىك شيەلەنىستىڭ كۇشەيگەنىن كورسەتەدى. ءارتۇرلى سەبەپتەرگە بايلانىستى تۋىنداعان بۇل نارازىلىقتار سوعىس جاعدايى ۇزاققا سوزىلعان سايىن بىرتىندەپ كۇشەيىپ كەلە جاتقانىن بايقاتادى.
