قازاقستان مەن اقش ادام قۇقىقتارى جونىندەگى كەزدەسۋدى ۆاشينگتوندا جالعاستىرۋعا كەلىستى، دەپ حابارلايدى "ادىرنا" ۇلتتىق پورتالى قر سىرتقى ىستەر مينيسترلىگىنىڭ ءباسپاسوز قىزمەتى.
«استانا قالاسىندا قازاقستان رەسپۋبليكاسى پرەزيدەنتىنىڭ حالىقارالىق ماسەلەلەر جونىندەگى كومەكشىسى ەرجان قازىحان جانە اقش مەملەكەتتىك حاتشىسىنىڭ ازاماتتىق قاۋىپسىزدىك، دەموكراتيا جانە ادام قۇقىقتارى ماسەلەلەرى جونىندەگى ورىنباسارى ۋزرا زەيانىڭ تەڭ توراعالىعىمەن قر مەن اقش اراسىنداعى ادام قۇقىقتارى مەن دەموكراتيالىق رەفورمالار جونىندەگى جىل سايىنعى جوعارى دەڭگەيدەگى ديالوگتىڭ ءۇشىنشى وتىرىسى ءوتتى»، - دەلىنگەن حابارلامادا.
ءىس-شارا بارىسىندا تاراپتار ادام قۇقىقتارى سالاسىندا ءوزارا قىزىعۋشىلىق تۋدىراتىن ماسەلەلەر بويىنشا قازاقستان مەن اقش اراسىنداعى ىنتىماقتاستىقتى سىندارلى تۇردە تالقىلادى. تاراپتار پرەزيدەنت قاسىم-جومارت توقاەۆتىڭ ساياسي رەفورمالار باعدارلاماسىن، سونىڭ ىشىندە مۇمكىندىگى شەكتەۋلى ادامداردىڭ قۇقىقتارىن كەڭەيتۋ، ادام ساۋداسىنا قارسى ءىس-قيمىل، جينالىستار بوستاندىعىن، ءسوز بوستاندىعىن قامتاماسىز ەتۋ، باق-تى دامىتۋدى قولداۋ، سونداي-اق اكتيۆتەردى قايتارۋ جانە سىبايلاس جەمقورلىققا قارسى كۇرەس ماسەلەلەرىن ودان ءارى ىسكە اسىرۋعا نازار اۋداردى.
"امەريكالىق تاراپ ءوزارا مۇددەلەر مەن ورتاق قۇندىلىقتارعا نەگىزدەلگەن تابىستى جانە سەنىمدى ىنتىماقتاستىققا بەرىك ۇستانىمدارىن ءبىلدىردى. مەملەكەتتىك حاتشىسىنىڭ ورىنباسارى ۋزرا زەيا قر پرەزيدەنتى قاسىم-جومارت توقاەۆتىڭ ساياسي جانە الەۋمەتتىك-ەكونوميكالىق رەفورمالارىنا اقش تاراپىنىڭ تۇراقتى قولداۋىن راستاپ، سونداي-اق وتكەن جەلتوقساندا قازاقستان پرەزيدەنتى قول قويعان ادام قۇقىقتارى مەن زاڭ ۇستەمدىگى سالاسىنداعى ءىس-قيمىل جوسپارىن دايەكتى جۇزەگە اسىرۋدىڭ ماڭىزدىلىعىن اتاپ ءوتتى" دەلىنگەن حابارلامادا.
ايەلدەر مەن بالالارعا قاتىستى زورلىق-زومبىلىققا نولدىك توزىمدىلىك ساياساتىن كۇشەيتۋگە ەرەكشە نازار اۋدارىلدى. اتاپ ايتقاندا، امەريكالىق تاراپ ا.ج. 15 ساۋىردە قابىلدانعان قر-دا وتباسىلىق-تۇرمىستىق زورلىق-زومبىلىق پەن بالالارعا قاتىستى زورلىق-زومبىلىق ءۇشىن جازانى قاتاڭداتاتىن زاڭدى قۇپتادى.
سونىمەن بىرگە، تاراپتار كوپجاقتى جانە وڭىرلىك پلاتفورمالار دەڭگەيىندە ادام قۇقىقتارىن ىلگەرىلەتۋ ماسەلەلەرىن، سونىڭ ىشىندە بۇۇ-نىڭ ادام قۇقىقتارى جونىندەگى كەڭەسى ارقىلى ىنتىماقتاستىقتى جانە نيۋ-يورك ق. وتكەن جىلعى «س5+1» ءسامميتىنىڭ قورىتىندىسى بويىنشا باستامالاردى جۇزەگە اسىرۋ ماسەلەلەرىن تالقىلادى.
كەزدەسۋ ناتيجەسىندە ءوزارا ءىس-قيمىلدى جالعاستىرۋعا جانە ديالوگتىڭ كەلەسى وتىرىسىن 2025 جىلى ۆاشينگتون قالاسىندا وتكىزۋ تۋرالى كەلىسىمگە قول جەتكىزىلدى.
