توقاەۆ فينليانديا پرەزيدەنتىن قازاقستانعا شاقىردى

1629
Adyrna.kz Telegram

قاسىم-جومارت توقاەۆ فينليانديانىڭ سىرتقى ساۋدا جانە حالىقارالىق دامۋدى قولداۋ ءمينيسترى، ساۋدا-ەكونوميكالىق ىنتىماقتاستىق جونىندەگى قازاق-فين ۇكىمەتارالىق كوميسسياسىنىڭ تەڭ توراعاسى ۆيللە سكينناريدى قابىلدادى. بۇل تۋرالى اقوردانىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.

مەملەكەت باسشىسى مينيسترگە ءىلتيپات بىلدىرە وتىرىپ، فين دەلەگاتسياسىنىڭ ساپارى ەكىجاقتى ىنتىماقتاستىققا تىڭ سەرپىن بەرۋ تۇرعىسىنان ماڭىزدى ەكەنىن اتاپ ءوتتى.

پرەزيدەنتتىڭ ايتۋىنشا، ديپلوماتيالىق قارىم-قاتىناس ورناعان 30 جىلدا فينليانديا سولتۇستىك ەۋروپا مەملەكەتتەرى اراسىندا ەكونوميكامىزعا ەڭ كوپ ينۆەستيتسيا قۇيعان ەكىنشى ەلگە اينالدى. سونىمەن قاتار فينليانديانىڭ ورتالىق ازيا ەلدەرىمەن ساۋدا اينالىمىنىڭ 90 پايىزى قازاقستانعا تيەسىلى.

قاسىم-جومارت توقاەۆ ەكى مەملەكەتتىڭ ساۋدا-ەكونوميكالىق، كولىك-لوگيستيكا جانە ءبىلىم بەرۋ سالالارىنداعى سەرىكتەستىگىن نىعايتۋ ماڭىزدى ەكەنىن اتاپ ءوتتى. مەملەكەت باسشىسى فين كاسىپكەرلەرىنىڭ قازاقستانعا قۇياتىن ينۆەستيتسياسىن ۇلعايتا ءتۇسۋ ءۇشىن جان-جاقتى قولداۋ كورسەتۋگە دايىن ەكەنىن جەتكىزدى.

ءوز كەزەگىندە ۆيللە سكينناري قۇرمەتپەن قابىلداعانى ءۇشىن قاسىم-جومارت توقاەۆقا العىس ايتىپ، ەكى ەل اراسىنداعى ىنتىماقتاستىقتى كەڭەيتۋگە الەۋەت مول ەكەنىن مالىمدەدى.

مينيستر قازاقستانعا ساپارمەن كەلگەن دەلەگاتسيا قۇرامىندا Nurminen Logistics Plc, Nokia, EastCham Finland, Business Finland, Lamor, Wärtsilä Finland, PayIQ, EPSE سەكىلدى 15 ءىرى فين كومپانياسىنىڭ وكىلدەرى بار ەكەنىن جەتكىزدى. الداعى كەزدەسۋلەر بارىسىندا ساۋدا-ەكونوميكالىق بايلانىستاردى نىعايتۋ ماسەلەلەرى تالقىلانادى.

بۇدان بولەك، فين تاراپى استاناداعى فينليانديا ەلشىلىگى جانىنان ورتالىق ازيا ەلدەرىنىڭ ازاماتتارىنا قىزمەت كورسەتەتىن ۆيزا حابىن اشادى.

اڭگىمەلەسۋ بارىسىندا حالىقارالىق جانە ايماقتىق كۇن تارتىبىندەگى وزەكتى ماسەلەلەر دە تالقىلاندى.

قاسىم-جومارت توقاەۆ فينليانديا پرەزيدەنتى ساۋلي نينيستيوگە ىزگى تىلەگىن جولداپ، قازاقستانعا رەسمي ساپارمەن كەلۋگە شاقىردى.

پىكىرلەر