Aǵaıyndar-aý, bir-birimizdi alalamaı, birigetin kezimiz keldi ǵoı?! - Zaıtov

4837
Adyrna.kz Telegram

"El arasy tatý, memlekettiń irgesi bútin bolsyn desek, "qyrylǵansha" jumylaıyq". Osy kúnge deıin alǵa baspaǵanymyz bir-birimizdi aıaqtan tartqannyń keseli ǵoı". Bul pikirdi QR Parlamenti Májilisi depýtattyǵyna úmitker Rınat Zaıtov málimdedi, dep jazady "Adyrna" ulttyq portaly. 

"Qurmetti týystar. Qarǵa tamyrly Qazaq balasy ár saılaý saıyn nege jaýlasady? Aıtyńyzdarshy. Ne qýyp, neni kóksep júrmiz? Kelisemin. Ótken kezeńde ókinish az emes. Biraq, ne sebepten biz bir kúndik báıgege bola júz júırikti alalap jatyrmyz? Osy kúnge deıin alǵa baspaǵanymyz bir-birimizdi aıaqtan tartqannyń keseli ǵoı. Aǵaıyndar-aý birigetin kezimiz keldi ǵoı?! Ońǵar Qabden baýyrym "Nar táýekel"- "Nur táýekel"-dep muqatty. Iıa keıbir baýyrlarym úshin bir áripti ózgertýde turǵan eshteńe joq shyǵar.... Ózime olaı emes. Bir áriptiń mańyzy óte zor. Óıtkeni, bir áripti ózgertseń kóóóp maǵyna ózgeredi. Mysaly: Qazaqtyń bir árpin ózgertse -mazaq, Namystyń bir árpin ózgertse - qamys bolady, Sondyqtan men úshin Amanat pen Jamanattyń, Nar men Nurdyń, Qoshanov pen Qosanovtyń (dushpandarǵa syılyq) aıyrmasy óte úlken. Árippen alysqansha, Halyqpen tabysaıyq. Qolymyzdan kelse julysqansha uǵysaıyq! Qalǵany jaratqannyń quzyrynda.  Biz úshin bul saılaý - eldi jumyldyratyn bir naýqan. Shataspańyzdar", - dep jazdy Zaıtov.

Rınat Zaıtovtyń aıtýynsha, maqsaty bir adamdar ózara arazdaspaı, bereke-birlikte bolýy mańyzdy.

"Men bárińizge tilekshimin. Árbir táýelsiz kandıdattyń, árbir partııanyń Qudaı mańdaıyna jazǵan óz joly bar. Degenmen, bárimizdiń tilegimiz bireý shyǵar? El arasy tatý, memlekettiń irgesi bútin bolsyn desek, "qyrylǵansha" jumylaıyq. Sóz joq men- AMANAT partııasynyń baǵdarlamasyn jaqtaýshymyn(arǵysyn kórermiz.) Óıtkeni AMANAT partııasynyń baǵdarlamasynda meniń kóp tilegim oryn taýypty. Endi sony júzege asyrýǵa bar kúshimizdi jumsaýymyz qajet. Áıteýir úmit-tilegi bir pikirlesterimniń janyndamyn. Erteńime degen kishkentaı senim bar. Kúmánim joq buıyrtyp, parlament tórine eline jany ashıtyn, júreginiń qaǵysy- aram tabysynyń arbaýyna baǵynbaıtyn adamdar kelse, memlekettiń bolashaǵy bolady! Tek ondaı adamdar bir partııa nemese bir uıymda toptaspaǵan (sebebi kóp). Bir bilerim, maqsaty bir adamdardyń arazdasýy múmkin emes! Qudaı úshin, el úshin bir aı shydap, barlyq álemge yntymaǵymyzdyń baryn kórseteıikshi. Bir úmitkerdi tórge shyǵaramyn dep, basqalaryn kórge tyǵýdy ádet qylmaıyqshy. Barlyǵy bir Qudaıdyń qolynda. Ádil saılaý bolsa, ádil qoǵam qalyptasatyny anyq! Barlyq úmitkerlerge sáttilik tileımin! Nar táýekel!", - dedi Zaıtov.

"Adyrna" ulttyq portaly 

Pikirler