"Qoınyna syr búkken kezdesý". Aqpannyń 20-juldyzynda AQSh Prezıdenti Djo Baıden "beıseýit júriske salyp", tosynnan, jarııasyz-jasyryn Kıevke soqty. AQSh bıliginiń aq shatyryna aınalǵan Aq úıdiń baspasóz qyzmeti mundaı málimdemeni aıtqan joq. Olar qurama shtattar basshysynyń resmı saparmen Polshaǵa baryp-qaıtatynyn, al Ýkraınaǵa bet burmaıtynyn basa habarlaǵan edi.
Kıevke sapar asa qupııa josparmen jasyryn túrde júzege asty. Baıden senbiniń qońyr keshinde qoǵam nazarynan boı tasalap, jyraqqa ketti. Janyna jýrnalıster men reporterlerdi ertpedi. Prezıdent Jeksenbi kúni qulqyn sáride Vashıngtonda bolýy tıis edi. Biraq Ýkraına astanasynan biraq shyqty.
AQSh basshy Kıevke taban tiregen senbiniń tańynda qaýip-qater yqtımaly ulǵaıyp, qalada dabyl qaǵylyp jatty. Mundaı sapardy, tipti, AQSh Ulttyq qaýipsizdik keńesiniń basshysy Djon Kırbı joqqa shyǵaryp baqqan edi. Ol Prezıdenttiń Polshaǵa baryp, keri qaıtatynyn málimdegen.
Degenmen, sapardan bir kún buryn Politico basylymy munda bir gáp baryn ańdaǵan. Olar Baıdenniń Ýkraına shekarasynan jasyryn ótýge múmkindik izdep jatqanyn jazyp, astyrtyn qadamdardyn sezgen. Biraq saıası elıtanyń kópshiligi mundaı "jankeshti" áreket Baıdenniń jeke basyna qaýip tóndiretinin aıtyp, múmkin emes dep sanady.
Baıdenniń Kıevke sapary, CNN jazǵandaı, "qupııaǵa toly". AQSh prezıdenti AQSh teńiz avıaııasynyń Endrıýs bazasynan (EST) tańǵy saǵat 4:15-te ushady. Reporterlerge óz qurylǵylaryn alyp júrýge tyıym salynady.
Baıden kelgen tańda Kıevtiń ortalyǵyndaǵy birneshe kóshede kólik qozǵalysy toqtatyldy. Biraq jergilikti buqaralyq aqparat quraldary esh qulaqtandyrylmaıdy. Amerıka prezıdentiniń sapary resmı túrde habarlanbaıdy. Baıdenniń kelýi týraly alǵash jazǵan bloger - Mark Feıgın. Keıin soqtaly saıası jańalyqty "Qazirgi Ýkraına" jýrnalısteri ilip áketip, Baıden men Vladımır Zelenskııdiń Kıev ortalyǵyndaǵy Mıhaılovskıı alańynda júrgen vıdeosyn jarııalady. Ol Zelenskıımen birge Mıhaılovskıı shirkeýine baryp, "Kóktegi júzdikter" atty batyrlar memorıalyna gúl shoqtaryn qoıdy.
Kóp uzamaı Baıdenniń saparyn Zelenskııdiń ózi rastady, ol AQSh prezıdentimen birge túsken fotosýretin jarııalady, sodan keıin ǵana baryp Aq úı resmı málimdemeni maquldady.
Aq úıdiń málimdemesinde Baıden "Ýkraına demokratııasyna, egemendigi jáne terrıtorııalyq tutastyǵyna myzǵymas ári talasqa túspeıtin" qaǵıdatty maquldaý úshin barǵan dep kórsetiledi. Onyń Ýkraınaǵa kórsetiler kómek úlesin keńeıtý máselesin talqylaıtyny aıtylady.
"Pýtın óziniń shapqynshylyq áreketin bir jyl buryn bastaǵanda Ýkraınany ońaı shaǵylatyn jańǵaq dep oılady. Batysyń bolsa, qaq jaryldy. Pýtın o basta kúshenip, tipti bizden asyp túsemin dep oılady. Biraq ol ońbaı qatelesti", — dep jazdy Baıden.
AQSh prezıdenti Ýkraınaǵa "asa qajetti quryl-jabdyqty"jetkizý buıryǵyn jarııalady. CNN-niń kórsetýinshe, Ýkraınaǵa qosymsha beriletin kómek mólsheri 500 mıllıon dollarǵa para-par. "Qoldaý qorjynynda" (paket) áskerı tehnıka, sonyń ishinde artıllerııalyq oq-dáriler, tankke qarsy "Djavelın" keshenderi men gaýbıalar toptastyrylady.
Baıdenniń Kıevke sapary kezinde áýe dabyly úzdiksiz zarnap, saqtyq sharalarynan habarlap jatty. Biraq Reseı zymyrandardyń Kıev aspanyn búrkep, áýe keńistigin álemtapyraq etkeni jaıly derekter tirkelgen joq.
"Adyrna" ulttyq portaly
