دەپۋتات امانجول ءالتاي جات اعىمداردىڭ جەتەگىندە كەتكەن كەيبىر قازاقستان ازاماتتارى جۇرتتى اداستىراتىن تەرىس پىكىرلەر تاراتىپ، ۇلتتىق قۇندىلىقتارىمىز جايلى قاتە وي ءبىلدىرىپ جاتقانىن اتاپ ءوتتى، دەپ جازادى "ادىرنا" ۇلتتىق پورتالى.
ول ءماجىلىس وتىرىسىندا اتالعان پىكىر يەلەرىنە قاتىستى شارا قولدانۋدى تالاپ ەتتى.
"اسىرەسە، ءدىني جات اعىمداردىڭ جەتەگىندە كەتكەن كەيبىر قازاقستان ازاماتتارى جۇرتتى اداستىراتىن تەرىس پىكىرلەر تاراتۋدا. بۇعان الەۋمەتتىك جەلىدە جەلدەي ەسىپ جۇرگەن "دومبىرا – حارام" دەگەن سەكىلدى ادام شوشىتار الىپ-قاشپا سوزدەر دالەل. دومبىرا – تاتۋلىق پەن بىرلىكتىڭ مامىلەگەرى. اتا تاريحىمىزداعى نەبىر الاساپىران زامانداردا ۇلتتى ۇيىستىرۋعا، ەلدى بىرىكتىرۋگە، ەرلەردى ەل قورعاۋعا شاقىرۋعا زور ءرول اتقارعان", دەدى ءالتاي ءماجىلىستىڭ بۇگىنگى وتىرىسىندا.
دەپۋتات اتا-بابالارىمىز بىلەگىنەن ءال كەتىپ، وزەگى تالىپ، اقتىق دەمى شىققانشا قولىنان دومبىراسىن تاستاماعانىن قوسا كەتتى:
"ەندەشە، دومبىراعا ءتيىسۋ – ۇلتقا ءتىل تيگىزۋ، ءتولتۋما مادەنيەتىمىزدى قورلاۋ، وتكەن تاريحىمىز بەن بۇگىنىمىزگە كولەڭكە ءتۇسىرۋ دەپ قابىلدايمىز. كونستيتۋتسيامىزدىڭ 14-بابىندا ناقتى كورسەتىلگەندەي، قازاق حالقىنىڭ ۇلتتىق قۇندىلىعى مەن ەرەكشەلىگىنە ءتىل تيگىزۋگە ەشكىمنىڭ دە قۇقى جوق", - دەپ اتاپ ءوتتى دەپۋتات.
وسى ورايدا ءالتاي بىرقاتار شارانى اتقارۋ قاجەتتىگىن تالاپ ەتتى. ولار:
ءبىلىم بەرەتىن ورتا مەكتەپتەردە ءان-كۇي ساباعىندا دومبىرا اسپابىن ۇيرەتۋ وقۋ باعدارلاماسىنا ەنگىزۋ;
بۇقارالىق اقپارات قۇرالدارىندا، راديو جانە تەلەارنالاردا دومبىرا اسپابىنىڭ قۇندىلىعىن اشاتىن ءان-كۇي، جىر-تەرمە، ايتىس ونەرلەرىن كوبىرەك ناسيحاتتاۋ;
ءدىن ىستەرى جونىندەگى باسقارما تەرىس اعىم جەتەگىندە كەتكەن ادامدارمەن جۇمىس جۇرگىزۋدى كۇشەيتۋگە ءتيىس، دەدى ول.
