جەتىسۋ وبلىسىنىڭ پوليتسەيلەرى الەۋمەتتىك جەلىلەردە كوپ جىل ەڭبەك قۇلدىعىندا بولعانىن مالىمدەگەن ەر ادامدى ىزدەپ تاپتى، دەپ حابارلايدى “ادىرنا” ۇلتتىق پورتالى.
22 قاراشادا الەۋمەتتىك جەلىدە 10 جىل قاراتال اۋدانىنداعى شارۋا قوجالىق يەسىنىڭ قۇلدىعىندا بولعانىن مالىمدەگەن ەر ادامنىڭ ۆيدەوسى تارادى. پوليتسەيلەر ۆيدەونىڭ اۆتورى ۇشتوبە قالاسىنىڭ 44 جاستاعى تۇرعىنى ەكەنىن انىقتاعان
ەر ادام ءوزىنىڭ جانە وتباسى مۇشەلەرىنىڭ قۇجاتتارىن جۇمىس بەرۋشى زاڭسىز يەمدەنگەنىن ايتادى.
«قازىر ەر ادامنىڭ ءوتىنىشى رەسمي تۇردە تىركەلدى. وعان قاتىسى بار بارلىق ادامداردان تۇسىنىكتەمە الىندى. ياعني شارۋا قوجالىعىنىڭ يەسى، ونىڭ قىزمەتكەرلەرى، سونداي-اق جابىرلەنۋشىنىڭ تۋىستارى. قۇجاتتاردى زاڭسىز الۋ دەرەگى بويىنشا تەرگەۋ امالدارى باستالدى. قىلمىستىق ءىس اياسىندا، ءوتىنىش بەرۋشىنىڭ ەڭبەكتى پايدالانۋى تۋرالى كەلتىرگەن دالەلدەرى دە تەكسەرىلىپ جاتىر»، – دەدى وبلىس پد باستىعىنىڭ ورىنباسارى ەلدار ابدىكەنوۆ.
پوليتسەيلەردىڭ ايتۋىنشا، ەر ادام مەن قىزىنا كومەك كورسەتىلگەن. تەرگەۋ بارىسىندا ولار تالدىقورعان وڭىرلىك «ايەلدەردى قولداۋ ورتالىعى» قوعامدىق بىرلەستىگىنىڭ وكىلدەرى ۇسىنعان تۇرعىن ۇيمەن، كيىممەن جانە تاماقپەن قامتاماسىز ەتىلگەن.
