الماتىدا باراحولكادا ورنالاسقان "ەۋرازيا" ساۋدا ءۇيىنىڭ قۇرىلتايشىسى ەشقانداي ەسكەرتۋسىز ساۋدا ورىندارىن ساتىپ جىبەرگەن. سالدارىنان 60-قا جۋىق ادام تابىس كوزىنەن ايىرىلۋى مۇمكىن. بۇل تۋرالى 31-ارنانىڭ "ينفورمبيۋرو"باعدارلاماسى جاريالادى، دەپ حابارلايدى “ادىرنا” ۇلتتىق پورتالى.
ەندى كاسىپكەرلەر قۇقىق قورعاۋشىلاردىڭ ارەكەتسىزدىك تانىتقانىنا نارازى. سوزدەرىنشە، تەرگەۋ ۇزاققا سوزىلىپ كەتكەن
"ەۋرازيا" ساۋدا ءۇيىنىڭ ورنىندا اشىق بازار بولعان، الايدا ول 2014 جىلى ورتەنىپ كەتكەن ەدى. بۇل جاعدايدان كەيىن ساۋدا ءۇيىنىڭ يەسى كاسىپكەرلەرمەن كەلىسىمشارت جاساسىپ، عيمارات سالعان. ال ءار كاسىپكەر كەم دەگەندە 50 مىڭ دوللار اقشا سالىپ، بۋتيككە يەلىك ەتەتىنىن دالەلدەيتىن كلۋبتىق كارتا الىپتى. الايدا 2022 جىلى وزدەرىنە ەشتەڭە تيەسىلى ەمەس ەكەنىن كورسەتەتىن حات العان.
"ارينە، اڭ-تاڭ بولدىم. سەبەبى جەر تەلىمىن جالعا الۋ مەرزىمى بار، ال مەرزىم جىل سايىن جاڭارتىلىپ، 31 جەلتوقساندا اياقتالادى. ەندى بىزگە ەسكەرتپە جىبەرىپتى، مۇندا "ەۋرازيا" جشس يەسىنىڭ بىزبەن كەلىسىمشارتتى بۇزاتىنى ايتىلعان", – دەدى زارداپ شەككەن كاسىپكەرلەردىڭ ءبىرى شاحريزادا پالتۋشەۆا.
كەيىنىرەك قۇرىلتايشىنىڭ ساۋداگەرلەرگە ەسكەرتپەي نىساندى 2022 جىلدىڭ ساۋىرىندە ساتىپ جىبەرگەنى ءمالىم بولدى. ەندى جاڭا قۇرىلتايشى كاسىپكەرلەردى قوسالقى جالگەرلىك بويىنشا كەلىسىم جاساۋعا ماجبۇرلەگەن.
ء"بىز ءوز كۇشىمىزبەن مەنشىك يەسى قۇقىعى جارتى جىل ىشىندە توعىز ادامعا وتكەنىن بىلدىك. مۇنى نە ءۇشىن ىستەيدى؟ سەبەبى باعانى تۇسىرگىسى كەلەدى. عيماراتتىڭ ءوزى 5 ميلليارد تەڭگە تۇرادى، ال ولار كەلىسىمشارتتى 150 ميلليون تەڭگەگە جاساعان", – دەيدى ادۆوكات تاحير ماداتوۆ.
كاسىپكەرلەر جەلتوقساندا ارىز تۇسىرگەنىمەن، تەك 3 ايدان سوڭ عانا جابىرلەنۋشى دەپ تانىلعان. ونىڭ ۇستىنە كۇدىكتىلەر ءالى تەرگەلمەگەن، سالىق تەكسەرىسى جۇرگىزىلمەگەن دەيدى. قازىر ءىستى الماتى قالاسى الاتاۋ اۋدانىنىڭ پوليتسياسى تەرگەپ جاتىر.
"بۇگىنگى تاڭدا اۋدان پروكۋراتۋراسىنىڭ كومەگىمەن و. ەسىمدى ازاماتقا حالىقارالىق ىزدەۋ جاريالاۋ ماسەلەسى شەشىلىپ جاتىر", – دەدى الماتى پوليتسيا دەپارتامەنتىنىڭ رەسمي وكىلى سالتانات ازىربەك.
ساۋداگەرلەر تەرگەۋدىڭ ءادىل ءجۇرىپ، ءوز قۇقىقتارى قورعالعانىن تالاپ ەتىپ وتىر.
