شەتەلگە اكتيۆتەرىن زاڭسىز شىعارعان “Jusan Bank” قازاقستانعا قايتارىلادى. بۇل تۋرالى ساياساتكەر ەرلان سايروۆ ءوزىنىڭ Facebook پاراقشاسىندا حابارلادى، دەپ جازادى “ادىرنا” ۇلتتىق پورتالى.
- ءسۇيىنشى! الپاۋىت وليگارحتارمەن كۇرەسىمىز ءوزىنىڭ ناتيجەسىن بەرىپ جاتىر. بىزدىڭ سۇراۋعا سايكەس، قازاقستان رەسپۋبليكاسىنىڭ باس پروكۋراتۋراسى وسى ماسەلە بويىنشا جۇيەلى جۇمىس ىستەۋدە! الماتى قالاسىنىڭ بوستاندىق اۋداندىق سوتى «Pioneer Capital Invest» جشس مەن Jusan Technologies Ltd اراسىنداعى «First Heartland Jusan Bank» اق-نىڭ، سونداي-اق ونىمەن بايلانىستى ۇيىمداردىڭ (بۇدان ءارى – «Jusan» توبى) اكتيۆتەرىن شەتەلدىك يۋريسديكتسيالارعا بەرۋ تۋرالى مامىلەنى جارامسىز دەپ تانۋ تۋرالى الماتى قالاسى پروكۋرورىنىڭ تالاپ ارىزى بويىنشا ازاماتتىق ءىس قوزعادى،- دەپ جازدى ەرلان سايروۆ.
ساياساتكەردىڭ ايتۋىنشا، حالىق قازىناسىن قايتارۋ جۇمىستارى جالعاسىن تابا بەرمەك.
- "Jusan Bank" دەگى بىلىق-شىلىقتى انىقتاپ، كاپيتالدى مەملەكەتكە قايتارۋ جۇمىسى تۇبىنە دەيىن جەتكىزىلەدى! ۇلتتىق مۇددەلەردى قورعاۋ ءار-ءبىر ازاماتتىڭ بورىشى! حالىقتىڭ يگىلىگىن "جەپ-ءىشىپ" قويعان فاكتىلەردىڭ بارلىعىن انىقتاپ، ەل بايلىعىن مەملەكەتكە قايتارۋدى جالعاستىرا بەرەمىز! بىز فاميلياعا، بۇرىنعى ەڭبەگىنە، بايلىعىنا قارامايمىز! حالىق يگىلىگى مەملەكەتكە قايتۋى ءتيىس! بىز بىرگەمىز،- دەيدى سايروۆ.
“ادىرنا” ۇلتتىق پورتالى
