پرەمەر-ءمينيستردىڭ ورىنباسارى التاي كولگىنوۆ شىمكەنت قالاسىنا جۇمىس ساپارى بارىسىندا الەۋمەتتىك ماڭىزى بار نىسانداردىڭ جۇزەگە اسۋ بارىسىمەن تانىستى، ولاردىڭ اراسىندا ۇلتتىق جوبالار اياسىندا جۇزەگە اسىپ جاتقان نىساندار بار.
التاي كولگىنوۆ «وقۋشىلار سارايىنىڭ» قۇرىلىسىمەن تانىستى. اكىمدىكتىڭ مالىمەتى بويىنشا، عيماراتتا ميني-فۋتبولعا، ۆولەيبولعا، باسكەتبولعا جانە جاتتىعۋ جاساۋعا ارنالعان الاڭدار بار. وندا 2 مىڭ وقۋشى سپورتپەن اينالىسا الادى. ورتالىق بيىل پايدالانۋعا بەرىلەدى دەپ جوسپارلانىپ وتىر. سونداي-اق شىمكەنتتە كونگرەسس-حولل سالىنىپ جاتىر.
جۇمىس ساپارى بارىسىندا التاي كولگىنوۆ «جايلى مەكتەپ» ۇلتتىق جوباسىن ىسكە اسىرۋ اياسىندا سالىناتىن ءبىلىم بەرۋ نىساندارىنىڭ جوبالارىمەن تانىستى. جوبا اياسىندا شىمكەنتتە 25 مەكتەپ سالۋ جوسپارلانىپ وتىر. جاڭا فورماتتاعى مەكتەپتەردىڭ سالىنۋى ءۇش اۋىسىممەن وقىتۋ ماسەلەسىن تولىعىمەن شەشىپ، قوسىمشا وقۋشى ورىندارىن قۇرۋعا مۇمكىندىك بەرەدى.
سونىمەن قاتار شىمكەنتتە بىرقاتار مەديتسينالىق نىسان سالۋ جوسپارلانىپ وتىر. پرەمەر-ءمينيستردىڭ ورىنباسارى پاندەميا كەزىندە سالىنعان ينفەكتسيالىق اۋرۋحاناعا باردى. قازىر قالادا 315 پاتسيەنتتى قابىلداي الاتىن جالعىز بالالار اۋرۋحاناسى جۇمىس ىستەپ تۇرعانىن ەسكەرە وتىرىپ، ينفەكتسيالىق اۋرۋحانانىڭ عيماراتىن بالالار اۋرۋحاناسىنىڭ بالانسىنا بەرۋ بويىنشا جۇمىس جۇرگىزىلىپ جاتىر.
سونداي-اق كوپبەيىندى اۋرۋحانا سالۋ دا جوسپارلانعان. وندا جۇمىس ىستەپ تۇرعان ەمحانالاردىڭ جۇمىسىن جەڭىلدەتۋ ءۇشىن ەمحانا جۇمىس ىستەيتىن بولادى. كوپبەيىندى اۋرۋحانادا زاماناۋي تالاپتارعا ساي كەلەتىن يادرولىق مەديتسينا ورتالىعى اشىلادى. بۇل ساپالى مەديتسينالىق كادرلاردى دايىنداۋعا جول اشادى. وسىنداي كوپبەيىندى اۋرۋحانالاردى بىرقاتار وزگە وڭىردە سالۋ جوسپاردا بار.
اكىمدىكتەردىڭ الدىنا ۇلتتىق جوبالاردى ساپالى ىسكە اسىرۋ جانە الەۋمەتتىك جوبالاردىڭ قۇرىلىسىن ۋاقىتىلى اياقتاۋ مىندەتى قويىلعان. بۇل ماسەلەلەردىڭ بارلىعى – مەملەكەت باسشىسىنىڭ باقىلاۋىندا.
“ادىرنا” ۇلتتىق پورتالى
